5. ФЕБРУАР – На нєшкайши дзень народзела ше апатикарка и писателька Єлена Солонар.
1814 – У Бечу обявена Мала простонародна славеносербска песмарица Вука Караджича, хтора означела початок упознаваня Европи зоз сербску народну поезию.
1887 – У миланскей Скали першираз виведзена Вердийова опера Отело.
1900 – Народзена Єлена Солонар (Скеуш, Румуния, 5. фебруар 1900 – Руски Керестур, 28. май 1982) апатикарка, писателька, поетеса. Маґистер фармациї Єлена Солонар дзивоцке Поливка, остала у паметаню як почитована керестурска апатикарка и гумани здравствени роботнїк, народзена є у фамелиї учителя и управителя керестурскей школи Михаила А. Полївки (1868–1944). У Новим Садзе закончела штири класи гражданскей школи, а у Коложваре пияту. На Фармацийним факултету у Сеґединє, дипломовала 1923. року. Перше роботне место було єй Стари Футоґ, а потим єден час препровадзела на роботи у Беоґрадзе. Животне жаданє єй було врациц ше до Руского Керестура и помагац своїм людзом, цо ше єй и витворело 16. мая 1927. року. Теди зоз материялну потримовку свойого супруга Константина Кости Солонара отворела апатику у Руским Керестуре и у нєй робела по одход до пензиї. Апатикарка Солонарова, у валалє отримовала серию преподаваньох о гиґиєни женох и дзецох, а тиж и за школярoх и младеж. Таки курси пошвецени здравственей култури, лїченю и хоротом тирвали и по даскельо мешаци. Написи апатикарки Солонаровей обявйовани (медзи двома войнами) у рускей периодики. Писала о Ручней апатики, о тим як треба вариц хорим и слабим итд.