6. ЯНУАР – На нєшкайши дзень народзени Штефан Гудак и Юлиян Надь, а нєшка у вецей наших парохийох Вилїя.
1745 – Народзел ше пренаходзач Жак Ет’єн Монґолфє (Видалон лез Анонеу, Французка, 6. януар 1745 – Ардеш, Французка, 1. април 1799), хтори зоз братом Жозефом Мишелом 1783. року конструовал перши балон наполнєни зоз зогратим воздухом.
1822 – Народзел ше археолоґ Гайнрих Шлиман (Нойбуков, 6. януар 1822 – Напуль, 26. децембер 1890), хтори 1868. року пренашол Трою, хаснуюци податки зоз Гомерових шпивох Илияда и Одисея. Пренашол и Микену, Орхомен и Итаку, и потрошел на археолоґийни викопованя цале свойо милионске богатство.
1872 – Народзел ше композитор и пиянист Александер Николаєвич Скрябин (Москва, 6. януар 1872 – Москва, 27. април 1915).
1931 – Народзени учитель, писатель, новинар, публициста, роботнїк у култури и театре Штефан Гудак (Миклошевци, 6. януар 1931 – Петроварадин, 22. фебруар 2015). По законченей основней школи, нїзшу ґимназию з малу матуру закончел у Руским Керестуре, а учительску школу у Осиєку. Робел як учитель у Босни и Герцеґовини, у месце Києво, потим як директор школи у местох Трново и у Петровцох, а 1969. року ше з фамелию преселєл до Нового Саду и робел як редактор културней рубрики у Рускей редакциї Радио Нового Саду, одкаль 1991. року пошол до пензиї. Бул єден з найплоднєйших сотруднїкох у наших руских периодичних виданьох: Шветлосц, Народни календар, Литературне слово, Нова думка, Думки з Дунаю, у хторих му обявени велї приповедки, драми, прикази, критики и рецензиї. Бул и член Дружтва писательох Войводини. Як коавтор, вєдно з Михайлом Ковачом видал гумористични роман Гриц Бандурик, а самостойно видал: збирку приповедкох, роман Шлїдом голуба по нєбе, 8 драмски твори, з хторих велї и виведзени на сцени, два моноґрафиї, а до друку пририхтал и позберани твори Осифа Костелника и даскельо антолоґийни збирки. И сам бул заступени у вецей антолоґийох прози, писал и за старших и за дзеци, а остатня кнїжка – позберани писнї Зайда за мирни сон (2013) обявена му у виданю НВУ Руске слово.
1957 – Народзени Юлиян Надь, (Руски Керестур, 6. януар 1957 – Руски Керестур, 26. април 1989), новинар и писатель. Юлиян Надь робел як новинар у тижньових новинох Руске слово, робел и у часопису Шветлосц и ушорйовал Литературни додаток у новинох Руске слово. Писал и обявйовал у Пионирскей заградки, потим у Руским слове, у Шветлосци и Народних календарох, а паралелно писал и обявйовал и по сербски и македонски. Заступени є у Антолоґи Штефана Гудака Крижни драги, хтору видало Руске слово 1990. року. Исти видаватель му обявел и два окремни кнїжки – Польове страшидло (1985) и посмертне виданє його позбераней прози Валалски венцар (1994). Настрадал у Руским Керестуре, 26. априла 1989. року у транспортним нєщесцу.
Нєшка ше слави Вилїя по юлиянским календаре, дзень пред Рождеством Христовим – Крачуном. На Вилїю ше строго посци. У церквох нашей епархиї през тото тродньове швето буду служени Служби Божо, а нєшка ше после вилїйовей вечери ходзи по шпиваню, и зоз колядами винчує Крачун.