8. ДЕЦЕМБЕР – На нєшкайши дзень народзела ше поетеса Ярослава Кочиш Микита.
1948 – Народзела ше поетеса Ярослава Кочиш Микита (Руски Керестур 8. децембер 1948 – Руски Керестур, 17. юлий 2019). Ярослава Кочиш-Микита основну школу закончела у Керестуре, а Стредню хемийно-поживову школу Бошко Палковлєвич-Пинки у Вербаше. Робела у Друкарнї Руске слово. Кратки час робела у ОШ Петро Кузмяк покля нє сполнєла условия за одход до пензиї. Сотрудзовала у Литературним слове, а 1973. року єй у едициї Жридла обявена збирка писньох. На єй стихи компоновани велї шпиванки. Опробовала ше и як ґлумица аматер у проєктох Руского народного театра. Ярослава Кочиш-Микита умарла 17. юлия 2019. року, похована є на теметове у Руским Керестуре.
1954 – Сербски и горватски писателє и линґвисти посцигли Новосадску догварку о сербскогорватским литературним язику, хтору подписали 25 углядни фаховци за язик, зоз Ивом Андричом на чолє. Заключене же народни язик Сербох, Горватох и Чарногорцох єден язик зоз двома вигварянями, же обидва писма – кирилка и латинка – ровноправни и же язик ма заєднїцки правопис. После 60 роки, 2014. року у ревизиї Новосадскей догварки визначене же горватски и сербски язик два окремни язики и нє припознаваю обидва писма.
1955 – Рада Европи прилапела заставу Европскей униї.
1966 – Спорозуменє о забрани нуклеарного оружия у вселени подписали 28 жеми, уключуюци Совєтски Союз и ЗАД.
2015 – На програми XXV Дньох Миколи М. Кочиша у Новим Садзе отримана промоция кнїжки Леони Лабош Гайдук Цеплосц дїлох, перли словох – штверо дїяче у култури зоз Шиду з презвиском Лабош”, у видавательстве Дружтва за руски язик, литературу у културу.
