ШИД – Пондзелок и вовторок отримана општинска смотра рецитаторох „Поето народу мойого“ на хторей наступели и школяре хтори рецитовали по руски.
У штреднїм возросту школяр седмей класи Стефан Ркман рецитовал писню Миколи Скубана „Шицко змотане“, а школяр шестей класи Лука Цирба рецитовал писню Миколи М. Кочиша „Єден чудни, чудни швет“, обидвоме зоз Шиду.
Другого дня, у младшим возросту змагали ше школяр штвартей класи Никола Югаз зоз Шиду зоз писню „Лєм по моди“ Дюри Папгаргая, школярка трецей класи Милица Орещанин зоз Куковцох рецитовала писню „Мала кухарка“ Силвестера Д. Макая, школяр штвартей класи Александар Орещанин зоз Куковцох рецитовал писню „Кед би я“ Силвестера Д. Макая, а школярка штавртей класи Антония Рац зоз Бачинцох рецитовала писню „На телефону“ Ирини Гарди Ковачевич.
Школярох за змаганє порихтала наставнїца Наташа Еделински Миколка, а школярка Антония Рац достала похвалу и кнїжку.
