РУСКИ КЕРЕСТУР – За пондзелок, 21. юлий з початком на 19 годзин у просторийох Дома култури Руски Керестур, заказана 37. по шоре, тераз позарядова схадзка Националного совиту Руснацох на котрей ше будзе розправяц и гласац о зменох на чолє Одбору за образованє, о гашеню Роботного цела за науку и о потримовки проф. др Михайлови Фейсови за професора емеритуса.
У складзе зоз членом 9, пасуса 2 Дїловнїка о роботи НСР, предсидатель Йоаким Рац зволал позарядову схадзку, понеже найменєй трецина членох НС подписала писмене предкладанє зоз седем точками за дньови шор.
Седмеро члени НСР – Михайло Пашо и Биляна Ковачевич зоз Руского Керестура, проф. др Михайло Фейса, Мелания Мали, Стеван Самочета и Славиша Сабадош зоз Коцура, як и Микола Кухар зоз Дюрдьова дали предклад за позарядову схадзку.
Так на їх предклад, на Дньовим шоре схадзки буду шлїдуюци точки – Констатованє задзекованьох Роботного цела за науку, потим приношенє Одлуки о його гашеню. Надалєй предкладаю же би зоз места предсидательки и членїци Одбору за образованє була розришена Олена Папуґа, а на єй место менована Сенка Мученски, терашня членїца Одбору, як и вибор новей членїци/члена. На концу ше находза два точки за даванє потримовки проф. др Михайлови Фейсови за порушованє за вибор за професора емеритуса, и за його дальши анґажман на Филозофским факултету Универзитета у Новим Садзе у студийним 2025/26. року.