БЕОҐРАД – Тогорочни, 67. Медзинародни беоґрадски саям кнїжкох того року будзе зоз мотом Слово шлєбодне, од 19. по 27. октобер на Беоґрадским сайме. На штварток, 24. октобра актуалну видавательну продукцию представя и НВУ Руске слово и Завод за културу войводянских Руснацох з Нового Саду.
На штанду Покраїнского секретарияту за културу, явне информованє и одношеня з вирскима заєднїцами руски видавателє маю термини – на 11 годзин Руска матка, Руски Керестур и Завод за културу войводянских Руснацох, а на 12 годзин НВУ Руске слово.
НВУ Руске слово представи кнїжки з тогорочного видавательного плану: Нє менєй од вичносци/Не мање од вечности, двоязчна поезия авторки Вери Медич, Руско-салашски перли панонского путнїка писнї и приповедки Силвестера Макая, Рамик за Аниму поезия Владимира Кочиша, Порвисла приповедки Славомира Олеяра, Михайло Ковач – Олекса Мишанич – преписка писма авторе Янко Рамач, Олег Румянцев и Ярослав Мишанич, Єден вояк, два рабства, три униформи виглєдованє, преписка автора др Янка Рамача, Без фейкох, стресох шокох и вирусох поезия Михала Рамача, Сликовнїца Свадзба авторки Маї Зазуляк Гарди, Сликовнїца Карпатски шаркань Олени Планчак-Сакач.
У програми на покраїнским штанду на 11 годзин Руска матка, Руски Керестур представи свойо виданя, на 11:30 годзин Саша Сабадош, Микола Шанта и Борис Варґа буду бешедовац о заєднїцких виданьох Заводу за културу войводянских Руснацох и НВУ Руске слово.
Од 12 по 13 годзин будзе слова о виданьох НВУ Руске слово, а участвую: И. Гарди Ковачевич, Силвестер Д. Макаї, Владимир Кочиш, Вера Медич, Олена Планчак-Сакач, Ясмина Дюранїн, модератор: Микола Шанта.
На 67. Медзинародним сайме кнїжкох у Беоґрадзе, школски дзень будзе 24. октобра, а фамелийни днї буду 21. и 22. октобра, кед фамелия на Саям годна войсц за 1.000 динари. Поєдинєчна дньова уходнїца кошта 350 динари, ґрупна 250, а паркинґ место ше будзе наплацовац 200 динари на годзину, дзеци младши як 8 роки нє плаца уходнїцу.
Роботни час Сайму од 10 до 20 годзин.