НОВИ САД – У Руским културним центру пияток, 13. децембра отримана промоция нових радио-драмох по руски у продукциї Радио-телевизиї Войводини (РТВ), а о тей уметнїцкей форми хтора жанрово и технїчно представя вершински формат радийскей продукциї бешедовали представителє РТВ уключени до їх знїманя.
У фокусу вечара була бешеда о радио-драми „Такси за Вавилон“ по тексту Звонимира Павловича у режиї Александри Живкович хтора премиєрно емитована у марцу, як и найновшей, „Конєц“, чий автор и режисер Славко Винаї, а премиєрно будзе емитована на вовторок, 17. децембра на Трецей програми Радио Нового Саду (РНС) на 13 годзин.
О историяту и значеню радио-драми за руску културу и медийну продукцию бешедовали о.д. одвичательней редакторки програми по руски РНС Мирослава Даждиу, редакторка драмскей програми по руски Оля Хома и редактор Драмскей програми РТВ Слободан Ґоворчин, док о адаптованю за радийски формат и знїманю драми „Конєц“ бешедовал автор Славко Винаї. Нагаднути и плани за нови драмски радийски проєкти у 2025. року
Акцентовани даскельо значни факти – же радио-драма єден од жанрох хтори продуковани од самого снованя РНС, и же су од початку знїмани на пейцох службених язикох у АП Войводини, так же руска редакция у архиви ма вецей як 150 радио-драми по руски, од хторих половка за дзеци, а половка за одроснуту публику. Драмска продукция РТВ у предходних деценийох замарла, алє ше од 2015. обновює, а у тим процесу зняти и спомнути два нови радио-драми по руски. Тиж, у актуалней програмскей шеми РНС обезпечени порядни термини за емитованє драмох з радийскей архиви, тк же руски радио-драми мож слухац стреду и нєдзелю од 3 до 5 годзин рано.