ЕПАРХИЯ – З нагоди швета св. Миколая по юлиянским календаре, хторе будзе на ютре 19. децембра, у вецей наших парохийох святи Миколай будзе дзецом даровац дарунки нєшка пред шветом.
У Коцуре у Прокатедралней церкви Успения Пресвятей Богородици нєшка, 18. децембра, на 18 годзин почнє Всеночне, з нагоди означованя швета святого Миколая. Потим, коло 19 годзин до церкви наидзе Миколай зоз пакециками за наймладших. Того дня будзе отримана и програма Миколайови на чесц, котру зоз дзецми пририхтує вироучителька Ксения Бесерминї.
У дюрдьовскей Церкви Рождества Пресвятей Богородици, тиж нєшка 18. децембра, вочи швета св. отца Миколая, на 18 годзин будзе Саночне, после хторого дзецом буду подзелєни пакецики. Пакецики и того року порихтал Церковни одбор. На швето св. отца Миколая 19. децембра Служба Божа почнє на 10 годзин, а на 18 годзин будзе Вечурня.
З нагоди швета святого Миколая, хторе ше означує 19. децембра, у парохийох у Шидзе, Беркасове и Бикичу святи Миколай подзелї пакецики на стреду 18. децембра. По словох пароха у Шидзе о.Михайла Режака, святи Миколай на 17 годзин придзе до церкви у Шидзе, потим на 17:30 годзин до церкви у Беркасове и на 18 годзин нащиви церкву у Бикичу.
У Ґосподїнцох у Грекокатолїцкей церкви святого архангела Михаїла, на штварток, 19. децембра, на швето св. отца Миколая, отрима ше Службу Божу хтора почнє на 8 годзин. После Служби дзецом буду подзелєни пакецики.
До Конкатедралней церкви св. апостолох Петра и Павла у Новим Садзе, святи Миколай придзе и будзе дзелїц дзецом пакецики на нєдзелю 22. децембра после читаней Служби Божей, хтора почнє на 17 годзин.