РУСКИ КЕРЕСТУР – Зоз 55. Манифестацию „Червене пупчеˮ у дворе школи „Петро Кузмякˮ, 30. юния почал Фестивал рускей култури „Червена ружаˮ
Фестивал вєдно отворели окремна совитнїца предсидательки Влади и министерки за културу зоз задлуженьом за защиту и унапредзованє правох у култури националних меншинох Алма Ризманович, предсидатель општини Кула Дамян Милянич и предсидатель Националного совиту Руснацох Йоаким Рац.
На початку наступели наймладши шпиваче – Музична овода. Музична руководителька Таня Фейди, а музичне провадзенє на гармоники Мирон Сивч.
У першей часци „Червеного пупчаˮ виведзени дзешец нови шпиванки за дзеци, котри провадзел дзецински хор „Шкорванчкиˮ, музична руководителька Лидия Пашо, а аранжмани за нови шпиванки написал Мирослав Пап.
Жири у хторим були Таня Орсаґ, Анамария Регак и Наталия Зазуляк додзелєл три награди за композицию и єдну награду за текст. Награду за найлєпши текст достала Танита Ходак за шпиванку „Брацик”. А тиж Танитова композиция „Єшеньски бриґи” того року заслужела трецу награду. Другу награду за композицию жири додзелєл шпиванки „Дзецински памятки” хтору компоновал Дориан Чизмар. Награду за найлєпшу композицию на тогорочним „Пупчуˮ достала Весна Медєши за шпиванку „Мамова помоцнїца”.
У другей часци „Червеного пупча”, интерпретовани народни шпиванки у забавним духу. Шпивачох провадзел бенд „Горуци кромплї” у чиїм составе: Патрик Варґа (буґни), Иван Планчак (бас ґитара), Сашо Палєнкаш (ґитара), Кристина Русковски (клавир), Мартина Фейди (флаута) и Мирослав Фейди (кларинет). Состав оформел и пририхтал Сашо Палєнкаш.
Жири у составе Оксана Марянац, Мирослав Малацко и Таня Фейди додзелєл три ровноправни награди младим шпивачом. Награди достали Йована Петрович за интерператицию шпиванки „А я така чарна”, Хана Дюричкович за виводзенє шпиванки „Чайки, чайки” и дует Марко Колошняї и Лука Фа за интерпретацию шпиванки „Шицким добре”.
Манифестация отворена з традицийну шпиванку „Нашо швето”, а закончена з „Тисяч радосци”, хтори одшпивал Хор „Шкорванчки”, а програму водзели Ксения Катрина и Валентина Гарди и Минеа Югас.
