РУСКИ КЕРЕСТУР – Члени Добродзечного огньогасного дружтва Руски Керестур, вовторок, 20. авґуста орґанизовали акцию, та позалївали млади древка у лєшику на концу валала од беґелю, як и на новим населєню коло силосох.
Древка залївали и младши члени ДОД, а присутни бул и предсидатель Михайло Рац, як и секретар Месней заєднїци Михайло Пашо.
То уж пиятираз же огньогасци того року залїваю древка, а на основи у марцу подписаного меморандуму зоз Општину Кула котра ше обовязала же будзе и финансовац тоту їх активносц.
По словох предсидателя Раца, гоч обецанє по тераз нє сполнєте, огньогасци заш лєм зоз своїма моцами и о своїм трошку намагаю ше залївац древка котри посадзени прешлєй єшенї, бо то у тей суши нєобходне.
