ЗАҐРЕБ (ГОРВАТСКА) – У Грекокатолїцкей катедрали св. Кирила и Методия на Горнїм городу, всоботу, 14. децембра отримана дзешата манифестация Руснацох Републики Горватскей „Крачун у Заґребе”.
У полней катедрали присутним ше зоз крачунскима шпиванками, колядами представели културно-уметнїцки дружтва: КД Руснацох Винковци, КПД Рускиня и Руснак Заґреб, КУД Осиф Костелник Вуковар, КУД Яким Ґовля Миклошевци, КУД Яким Гарди Петровци и КД Цвелфериї Раєво Село.
Манифестацию ше отримує з цильом же би ше зачувало и розвивало културну творчосц у форми жридлових крачунских шпиванкох, збогацело скарб рускей националней меншини и же би ше розвивало културни идентитет Руснацох Републики Горватскей.
Орґанизаторе манифестациї КПД Рускиня и Руснак зоз Заґребу и Союз Русинох Републики Горватскей, а под покровительством Совиту за национални меншини Републики Горватскей.
