НОВИ САД – У Конкатедралней церкви святих апостолох Петра и Павла на нєдзелю 7. децембра, преподаванє на тему „Пост и молитва” отримал фра Илия Аланджак.
После пополадньовей Служби Божей ґвардиян манастира св. Анти и парох тей церкви у Беоґрадзе фра Илия Аланджак отримал преподаванє о молитви и посту и тирвацим обраценю чловека. У своєй бешеди фра Илия Аланджак гварел же тот период то пририхтованє за славенє Исусового народзеня. А найлєпше пририхтованє за Крачун то пост, молитва и добри дїла. Гварел и же ше углавним притримуєме тїлесней димензиї посту, тото єме, то нє єме, алє важна и духовна димензия посту, а то одреканє од гриха у чим помага интензивнєйша молитва.
На пияток, 12. децембра на 18 годзин будзе Вечурня, а шпивац буду госци зоз Прешовскей епархиї.
Мож уписац дзеци за пакецики на швето св. Миколая. Пакецик кошта 800 динари. Миколай будзе ходзиц на нєдзелю 21. децембра после вечаршей Служби Божей. Пакецик мож приявиц до вовторку 16. децембра при панїматки Марусї, лєбо при вироучителькох Меланиї Римар, лєбо ш. Доминики.
На парохиї мож приявиц старих и хорих за крачунску споведз.
