ДЮРДЬОВ – Вечар шпиванки и шмиху – гуманитарни концерт за Ваню Романового отримани у викенду за нами, всоботу 22. априла, у Задружним доме у Дюрдьове, а вечар орґанизовал Михаил Рамач.
На концерту за добру народну шпиванку були задлужени Дзивоцка шпивацка ґрупа Културно-уметнїцкого дружтва „Тарас Шевченко” и Етно ґрупа „Василис”. Оґнєн Веселинович указал свою схопносц на ґитари, а за добри рокенрол бул задлужени Бенд „Врата рая и приятелї”.
Програму водзела комичарка и имитаторка Бояна Момиров, хтора на єдинствени способ допринєсла атмосфери и дала чаривносц цалому вечару.
Шкатула, до хторей могло положиц добродзечни прилог була положена на уходу до сали, а шицок позберани пенєж будзе уплацени на Ваньов рахунок у рамикох фондациї „Будз гумани – Александар Шапич”.
