КОЦУР – У просторийох Подручней канцелариї Националного совиту Руснацох у Коцуре внєдзелю вечар отримани литературни вечар поети и маляра Силвестера Макая на хторим представени його потерашнї кнїжки зоз акцентом на найновшей „Руско-салашски перли панонского путнїка”, обявеней того року у виданю НВУ „Руске слово”.
На початку модератор того сходу Микола Шанта привитал присутних, и зоз пар словами уведол публику до змисту котри плановани за тот вечар. О кнїжки „Руско-салашски перли панонского путнїка” бешедовал рецензент Микола Шанта, а писнї зоз спомнутого виданя читала Наташа Макаї Мудрох. Тиж, бешедоване и о других Макайових кнїжкох, а и сам автор публики приблїжел свою творчосц и слова зоз своїх дїлох.
На истим сходзе на пригодни способ означена и 80-рочнїца Серафини Макаї, котра нє була у можлївосци присуствовац пре здравствени причини. Виривки зоз єй кнїжкох читала Мария Горняк, а Шанта бешедовал о єй дїлу и уметнїцкей творчосци. З тей нагоди єй присутни пожадали здравя, и як Шанта додал, плановане же би була видрукована ище єдна єй кнїжка, остатня котру вон будзе редаґовац у своєй кариєри.
Орґанизаторе отриманого литературного вечара Литературна секция „Нашо крочаї” КУД „Жатва”.
