ВАТИКАН – Папа Франциско повинчовал Воскресенє Христово и у своїм порученю Urbi et orbi (Городу и швету) на Пасху, и на Площи святого Петра поручел же ше мир нє будує з оружийом, алє з розширенима руками и отвореним шерцом
Святи Отец здогаднул же Воскреснути єдини хтори каменє войнових и гуманитарних кризох може склонїц зоз драги чловечества и отвориц драги живота. Як сообщене у медию Ватикан нюз, папа модлєл за жертви и за дзеци у Израїлу, Палестини и України. Здогаднул и на проблеми Сириї, Либану, Гаития и африцких жемох и наглашел: „Чловек так часто нєнавидзи дар живота.”
Вон тиж гварел же Христос драга живота у штред шмерци, драга мира у штред войни, драга помиреня у штред мержнї, драга братства у штред нєприятельства. Исус нам отвера, з людскима очми патрено, нєможлїви преход, бо лєм Вон одклонює грих швета и пребачує нашо грихи.
Без пребаченя грихох нєт виходу зоз завартосци, предрозсудкох, медзисобних обвиньованьох, видумки у хторей ше вше смого себе ошлєбодзує, а других обвинює. Лєм Христос Воскреснути, даваюци нам пребаченє грихох, отвера драгу за обновени швет.