ОПШТИНА ШИД – Спрам податкох хтори дала предсидателька Општинскей виберанковей комисиї Сладяна Маховац, на подручу општини Шид по 15 годзин гласали 54,46 одсто гласаче од 28 тисячи 901 особа, кельо и уписани до виберацкого списку.
Гласанє ше одвива без проблемох, а гласаю и особи у своїм обисцу хтори нє у можївосци присц на гласацке место, а нащивюю их члени Виберанкового одбору.
На виберацким месце 37 у Червеним крижу у Шидзе по словох предсидателя Виберанкового одбору Милоша Ковинчича, уписани 747 гласаче, а по 14 годзин гласали 384 особи цо дакус вецей як половка.
Ковинчич додава же ше гласа без проблемох, 10 особи приявени за гласанє з обисца, а на тим виберацким месце и єден надпатрач зоз ЦЕСИДУ.
На виберацким месце 27 у Технїчней школи „Никола Тесла“ по словох предсидателя Виберанкового одбору Ивици Йовича, уписани 730 гласаче, а по 14 годзин гласали 395 особи, або 54 одсто. Йович додава же ше гласанє одвива без проблемох, а 27 гласаче приявени за гласанє у своїм обисцу.
