РУСКИ КЕРЕСТУР – Традицийна Жимска школа за паприґарох, у орґанизациї Землєдїлскей задруґи Керестурска паприґа, по першираз того року отримана вчера 15. януара у ресторану Три коруни у Руским Керестуре.
Презентацию своїх найефикаснєйших препаратох за пестованє паприґи отримали представителє трох компанийох – дипл. инж. польопривреди Милaна Яничиєвич и маст. инж. польопривреди Йована Байчич спред компаниї Аґросава, потим спред компаниї Ките – дипл. инж. Бояна Караклаїч и Лазар Ненадов и маст. инж. польопривреди Радован Беґович, як и дипл. инж Миодраґ Обрадович спред Аґромаркету.
Попри презентациї своїх продуктох, присутни од фаховцох слухали и о новитетох при препаратох, о нових активних материйох, як тих хтори ше зявели на тарґовищу, так и о тих хтори буду забранєни за хаснованє. Ґу тому, фаховци подзелєли свойо искуства зоз пракси зоз акентом на прешлорочну продукцию.
Шлїдуюци презентациї заказани за пондзелок 19. януара, и на штварток 22. януара у ресторану Три коруни на 11 годзин, а присуствовац можу шицки заинтересовани.
