РУСКИ КЕРЕСТУР – Внєдзелю, 23. фебруара на 13:30 зоз центру у Руским Керестуре пешо рушела ґрупа до Кули у хторей було коло 160 студентох, младих, та и старших гражданох з намиру потримац вимоги студентох.
Дзеци з родичами ишли и на бициґлох, а шмели мацери у кочикох ґурали дзеци цалом драгом.
Була то длугока колона хтору у центру валала, а и вонконцом Велького шора, як Керестурци наволую свою главну улїцу, випровадзали гражданє.
Млади ше добре орґанизовали, предводзел их трактор, мали редарох хтори их унапрямовали и совитовали през драгу, а вельочислени застави рускей националней заєднїци пирхали цалом драгом.
После кус менєй як двох годзинох ходу од Керестура по Кулу, на желєзнїцкей станїци их дочекали студенти зоз Кули и придружели ше ґу Керестурцом у пешаченю до центру Кули, дзе их чекало погосценє – кафа, чая, сладки и слани лакотки.
Поле двогодзинового друженя и правеня галайку отримани 15 минити цихосци за погинутих у Новим Садзе кед спадла стреха на гайзибанскей станїци, и хор одшпивал дакельо шпиванки.
