РУСКИ КЕРЕСТУР – Вчера, 49-еро предшколски дзеци зоз дзецинскей заградки „Цицибан” керестурского оддзелєня ПУ „Бамби” з Кули зоз своїма виховательками, мали шветочни приєм у ОШ „Петро Кузмяк” дзе од септембра буду ходзиц до першей класи.
У школским голу их привитала директорка Наталия Будински, а потим и педаґоґинї Мария Шанта и Наташа Мученски. З тей нагоди привитали их и їх будуци учительки Наталия Зазуляк и Мелания Рамач.
Їх школяре цо тераз закончели штварту класу, предшколцом виведли кратку програму, а вец и оводарци указали часточку того цо научели.
За дарунок од директорки кажди будуци першокласнїк достал бедж 270-роки образованя, а за шицких пририхтане почасценє.
Оводарци мали нагоду пообиходзиц найзначнєйши часци школи, од библиотеки, єдальнї, сучасних кабинетох и медлаб учалнї, през цо их поводзели педаґоґинї.
Будуци першокласнїки тих дньох тиж так шветочно з програму випровадзени зоз оддзелєня своєй дзецинскей заградки „Цицибан”. Тиж так достали Уверенє же закончели обовязну пририхтуюцу предшколску програму, хтора за упис до школи нєобходна.
Предшколски дзеци у „Цицибану” були подзелєни у трох ґрупох, у мишаней, цалей предшколскей и мишаней пополадньовей, а робели з нїма виховательки Даниєла Сопка, Блаженка Мецек, Оленка Русковски, Емилия Костич и Ясминка Чапко.
