РУСКИ КЕРЕСТУР – После вечаршей Служби Божей, внєдзелю, 14. децембра у Виронаучней сали др Даниел Черни зоз Кошицох, хтори директор Словацкого историйного институту у Риме, преприповедал цо нашол у своїх виглєдовацких интересованьох у Руских новинох и новинох Душпастир хтори видавала Мукачовска епархия о преслави Ювилейного 1925. року.
У интересантним преподаваню визначел же тедишня Мукачовска епархия поволала парохиї зоз Подкарпатскей Руси най орґанизую паломнїцтво до Риму и же би тото исте зробела и Крижевска епархия. У октобру 1925. року орґанизоване паломнїцтво на хторе пошли вирни зоз Подкарпатя, а у маю зоз Крижевскей епархиї, зоз Бачкей и Сриму на паломнїцтве були 100 вирни.
Владика кир Дионизий Няради того 1925. року бул три раз у Риме – першираз зоз грекокатолїками зоз Крижевскей епархиї, други раз зоз вирнима зоз Прешова и Мукачовскей епархиї, а треци раз знагоди 1600 рокох вселенского собору у Никеи.
Др Черни на интереснатни способ присутним пренєсол шицко тото цо записане о тих паломнїцтвох.
На преподаваню шпивала Женска шпивацка ґрупа Дома култури.
