ДЮРДЬОВ/ҐОСПОДЇНЦИ – Зоз традицийним поставяньом трох заставох – Републики Сербиї, Автономней покраїни Войводини и рускей застави зоз гербом на трох значних местох за Руснацох у валалє, на будинок Месней заєднїци Дюрдьов, Рускей школи и Културно-уметнїцким дружтве „Тарас Шевченко”, почало означованє Националного швета Руснацох у Дюрдьове.
У просторийох дюрдьовского Дружтва отримана святочна програма. После гимни Републики Сербиї и шветочней шпиванки Руснацох у Сербиї спред Орґанизацийного одбору присутних привитал координатор Подручней канцелариї у Дюрдьове Микола Кухар, а винчовали швето предсидатель Националного совиту Рускей националней меншини Йоаким Рац и Заменїца предсидателя Општини Жабель Милана Каназир. На означованю швета були и директор Заводу за културу войводянских Руснацох Саша Сабадош, предсидатель СО Жабель Радован Чолич и член Општинскей ради Душко Михелц.
Програму пририхтали члени секцийох КУД „Тарас Шевченко”. Иван Молнар пречитал о историї Руснацох, Владимир Молнар и Мария Рамач пречитали два писнї дюрдьовских писательох, а членїци Дзивоцкей шпивацкей ґрупи одшпивали три шпиванки.
Преслава швета предлужена у просторийох церковного дому Грекокатолїцкей церкви святого архангела Михаїла у Ґосподїнцох, дзе орґанизована вистава малюнкох зоз Подобових колонийох „Стретнуце у Боднарова”, а присутних привитал Владимир Салонски и визначел же барз значне же би Ґосподїнчанє нє забували на свой идентитет.
.Означованє Националного швета Руснацох у Републики Сербиї у Дюрдьове и Ґосподїнцох орґанизовала Подручна канцелария Националного совиту Руснацох Дюрдьов.