ОПШТИНА ЖАБЕЛЬ – Мирни протести, як потримовка студентом и просвитним роботнїком, вчера отримани у трох, од штирох, местох у Општини Жабель.
Коло сто особи застановели транспорт на крижаню драгох Николи Тесли и Святого Миколая у Жаблю. Зоз петнацминутову цихосцу дали почeсц петнац жертвом у нєщесцу на Желєзнїцкей станїци у Новим Садзе. Як дознаваме, Основна школа „Милош Црнянски” вчера застановела наставу до дальшого.
Од штерацец занятих у Основней школи „Йован Йованович Змай” у Дюрдьове, двацец осмеро заняти гласали за блокаду настави 24. януара и того дня нє робели, алє цали час були у школи, а менша часц занятих тримала скрацену наставу. Заняти у блокади, вєдно зоз родичами и школярами отримали протестни сход, зоз петнацминутову цихосцу, на крижаню драгох Краля Петра Першого и Святосавскей.
Мала часц гражданох отримала протесни сход и у Чуроґу.
Як дознаваме, вчера у Ґосподїнцох нє були протести. Настава була застановена вовторок, 21. януара, и того дня бул орґанизовани сход гражданох опрез Основней школи „Жарко Зренянин” як потримовка просвитним роботнїком.
