Привредни живот Руского Керестура од вше ше операл спредз на польодїлство, а вец такой и на ремеселнїцтво. У новших часох, та по нєшка найзаступенше було заградкарство т.є. продукция паприґи по хторей Керестур бул познати у цалей велькей держави. Од ремеслох котри ше тиж меняли през час, вецей як вик жиє – тапетарство.
Хто були перши керестурски тапетаре здогаднєме ше у тим напису зоз сиґурно тераз уж найстаршим майстром у валалє, а то сияртов и тапетар Владимир Джуджар.
Владимир ше за тоти ремесла виучел у майстра Штефана Надя Митї (1896–1967), надалєко познатого, почитованого и славного керестурского сияртова, або сарача (як писал и Мирон Жирош) и його старшого сина Владислава (1921–2008). У своїм мигелю майстор Штефан Митя вше мал найвецей шеґертох и калфох, и по пейцох, нє лєм з валалу и блїзшого околїска, алє и з Босни и Далмациї. Шило ше штверци и цала опрема за конї, аж и за зомборских и новосадских фиякеристох, а робу майстор Штефан предавал и по вашарох.
Но, животна приповедка майстра Штефана чудно поводзела, та як ранєти вояк у Першей шветовей войни, дзе страцел ногу, мал нагоди у Кошицох виучиц ище єдно ремесло – тапациранє. Принєсол нове знанє до свойого мигелю у Керестуре.
– Теди, попри сарачскей роботи, у майстра Митї ше тапацирало сици до кочох як роботних так и парадних и предавало ше их по вашарох, а потим и канабелї и отомани. Майстор обидва ремесла познєйше научел и старшого сина Владислава, а младшого Любомира дал виучиц за тишлїра т.є. столара, та од вчасних пейдзешатих рокох прешлого стороча вєдно правели отомани и канабелї, а потим и кавчи – приповеда нам Штефанов шеґерт, Владимир Джуджар.
Радей души пошол за шеґерта до майстра Штефана
И Владимирова приповедка цикава, народзени є 1939. року, а за шеґерта до майстра Штефана пошол 1952. року.
– Були зме сушедово, та раз кед зме ше стретли у Надьордьовей карчми, поволал ме за шеґерта. Я радей души пошол, а оцец ме нє барз сцел дац, бо зме мали жеми. До рока сом бул шеґерт, и оцец тельо мацер мучел же я пан, ходзим рано на роботу, а вон на польо, та сом охабел и до рока сом ше ганьбел од Штефана, нє шмел сом ше з нїм стретнуц. И заш ше так трафело же сом убег до тей старей Надьордьовей карчми, а вон бул там, та ми гварел: „Яй Владимире, Владимире, нє будзеш ти бановац? Нє придзеш назад?” Я такой: „Боме пойдзем, та як будзе”. Любел сом тоту роботу, та сом пришол дому и гварел: „Я идзем назад”. Одвитовали ми: „Но кед ши надумал, та идз”. Так сом ище два роки бул шеґерт – виприповедал нам майстор Владимир.
Теди з нїм у майстра були ище двоме шеґертове – Ириней Бучко и Владислав Маґоч з Кули, вони були парняци, а од калфох бул и старши Славо Пашо. Майстров син Владислав єден час жил и робел у Коцуре.
– Правели зме сици, отомани, канабелї, а кавчи аж кед дахто од майстра Штефана поручел. Славо пришол з Коцура, бо вон знал, та и нас ту учел. О єден час, майстор ми дал бициґлу и послал ме до Коцура до Славу же бим ше дакус баржей випраксовал. И кед нас поошлєбодзовал як шеґертох, Славу волал назад до Керестура и почали зме правиц кавчи як калфове. У Штефана зме покладали за сияртова, а за тапетарох зме пошли покладац майсторски испит до Вербасу – поздогадовал ше майстор Джуджар. Як приповеда, кед ше „вишлєбодзели” як шеґерти, майстор Штефан пошол до пензиї, од 1957. мигель приявел Владислав, у хторого вец вони троме далєй випекали обидва ремесла як калфове.
– Теди ше уж сияртовске ремесло помали гашело, а тапетарске ше розрастало. Зоз майстром Славом зме вельо и кавчи правели и мадраци за робну хижу у Оджаку. Алє, пре якиш причини майстор мушел заврец мигель и преквалификовал ше за автопревожнїка – гварел нам Джуджаров, котри вец вєдно з Иринейом Бучком пошол робиц до Фабрики меблю „Дрина” до Вербасу. Джуджаров зоз супругу аж и бивац там пошли, алє о якиш час обидвоме ше врацели до валалу.
– Цошка ше нам там нє пачела плаца, та ми раз Ириней гварел же ше враци до валалу и отвори мигель на приватно, та як му будзе. Так и поробел, а о рок вец и я за нїм. Гоч зме ше з мою врацели без динара, анї родичи нє мали, нашла ше добра душа – нина Папуґова, котра нас прияла бивац и дала место за мигель, правда, у хлїве, дзе поза плахту була крава – здогадує ше майстор Владимир часох кед зробели шмели крочай, бо теди приватне поднїмательство нє же нє було потримане од держави, алє и сперане, найчастейше през вельки порцийї. Но, и Джуджаров ше одшмелєл, и свой мигель приявел 1966. року, та у нїм успишно робел по свойо пензионованє.
– Перши рок ме порцийни референт, кед видзел дзе робим, посановал и ошлєбодзел од порциї. Кед сом ше дакус змогол купел сом порту на Маковским шоре, там отворел и почал робиц. Перши ми шеґерт бул Михал Варґа, познати як ґлумец, котрого сом тримал як сина, а познєйше и Мирон Варґа и нїхто вецей нє сцел у Керестуре виучиц тото ремесло. Обидвоме були барз добри, могол сом на нїх шицко охабиц и роботу и обисце, вше зме ше порадзели як треба. Михал пошол на другу роботу, а Мирон тиж приватно отворел. Обидвоме були добри майстрове, а Мирко и лєпши одо мнє и вон приватно робел по пендзию – заключел майстор Владимир.
Керестур постал познати и по тапетарох
Приватно, познєйше од Джуджара и Бучка, отворел и старши од нїх, тиж Штефанов шеґерт, Славо Пашо. Ириней Бучко ше з тапетарством приватно занїмал тиж по свою пензию, и мал вецей занятих. Бучко свойо ремесло пренєсол и на своїх штирох жецох котри самостойно робели, а теди штредком 90. рокох, як познате, тапетарство у Керестуре, так повесц, експлодирало. Тераз нє як дакеди, кед нє могло робиц без майсторского испиту, способ роботи ше цалком пременєло як и материяли, а тапетарски мигелї, цо векши, цо менши, цо за нови мебель, цо за преробки, сиґурно було и вецей як двацец. Керестур теди окрем по паприґи, постал познати и по тапетарох.
З часом ше їх число зменшовало, алє и по нєшка Керестур остал тапетарски валал. З того ремесла сиґурно жиє штварцина валалчанох, а и жителє околних местох. Вони заняти, по словох терашнїх поднїмательох у пейцох векших, и голєм пейцох менших тапетарох, цо директно, або у тих цо услужно робя за других, а тиж єст отворени и сиґурно 10 роботнї дзе ше прави кухнї, котри отворели млади столаре.
Тапетарство у Mитьовей фамелиї
– Сияртов Штефан бул барз почитовани майстор. У Зомборе ше знало кед пришол Штефан, и вше мал з людзми бешеди, а знал вельо язики бешедовац, и по мадярски, нємецки… та го нє мож було спреведнуц, и людзе го барз почитовали – шведочи майстор Джуджар. Свойо знанє Штефан пренєсол на сина Владислава – Славу, а вец и на унука Юлина, хтори робели у кооперативи з младшим Штефановим сином, тишлїром, Любомиром. Владислав робел дас по 1970. рок, як шведочи його младши син Дюра, та гвари же оцец, заш лєм, волєл камиони, авта, механїку, а чежко було и материял набавиц за тапациранє. Тапетарска традиция ше ище раз врацела до Митьового обисца на Новим шоре 2000. року, кед мигель отворел праве Штефанов младши унук, Дюра Надь, котри тоту роботу робел по 2015. рок.
