ҐЛОЖАН – На 53. Словацким фолклорним фестивалу Танцуй, танцуй, на хторим отримани концерти шпивацких ґрупох, народних ансамблох и танєчних ґрупох участвовала и виводзацка фолклорна ґрупа Руского културного центра з Нового Саду.
У Ґложану од центра места всоботу, 14. юния рушел шветочни дефиле учашнїкох на 53. Словацким фолклорним фестивалу Танцуй, танцуй, а медзи нїма були и новосадски млади фолклораше зоз Руского културного центра. Вони наступели у вечаршей ревиялней часци, а одтанцовали танєц Коломийка, руководитель Владимир Иван.
У рамикох Фестивалу орґанизовани рижни провадзаци змисти, так штварток отворена самостойна вистава Карола Бартоша Здогадованє на 1975. рок, а пияток бул Вечар словацкей музики. Всоботу Здруженє женох Словенка з Ґложану порихтали виставу фартухох, а бул и вашар народней творчосци и вистава роботох ґложанских подобових уметнїкох. Внєдзелю на Ґала концерту наступели КПД Єднота з Ґложану и Фолклорни ансамбл Кокаван зоз Кокави на Римавици зоз Словацкей.
Фестивал орґанизовали Национални совит Словацох у Сербиї, Завод за културу войводянских Словацох, Општина Бачки Петровец, Месна заєднїца Ґложан и КПД Єднота з Ґложану.
