ВЕРБАС – По сообщеню ЯКП „Комуналєцˮ зоз Вербасу, їх дїловни єдинки „Чистотаˮ, „Водовод и канализацияˮ през наиходзаци новорочни и крачунски швета буду робиц зоз кус вименєним обсягом роботи.
Мали пияц у Вербаше будзе отримани поряднє, остатнєй стреди у року, 31. децембра, а пияц у Коцуре котри мал буц на пияток, 2. януара, нє будзе отримани. Вельки пияц у Вербаше будзе поряднє, на соботу, 3. януара.
По словох компетентних з вербаского Явного комуналного подприємства, з оглядом же Крачун на стреду, шлїдуюци Мали пияц у Вербаше будзе на вовторок, 6. януара.
Дїловна єдинка „Чистотаˮ 1, 2. и 6. януара будзе робиц поряднє, а за Крачун нє будзе робиц. Шмеце ше будзе одношиц по розпорядку, а городски улїчки ше будзе чисциц як и звичайно.
После Крачуна, одношенє комуналного шмеца будзе преложене за єден дзень, як у Вербаше, так и у населєних местох вербаскей општини. Спрам того, зоз Коцура ше шмеце будзе одношиц на соботу, 10. януара.
През швета, односно 1, 2, 6. и 7. януара нє будзе ше наплацовац паркинґ.
Роботнїки „Капелиˮ буду у 24-годзиновей приправносци, Жимска служба будзе дежурна у трох сменох, а през швета и екипи „Водоводу и канализациїˮ буду дежурац и интервеновац у случайох потреби.