РУСКИ КЕРЕСТУР – Церковни одбор и тутор теметова Михал Рац всоботу, 17. мая, орґанизовали роботну акцию же би ше викерчело и розчисцело зароснути часци теметова.
Робело ше на часци теметова дзе бул, як го давно волали, Буґерски теметов, хтори по мераню ґеометра припада керестурскей церкви, и часц теметова цо патри на бензинску пумпу за Ризничову долїну. Тота часц барз зароснута зоз черяками, дзивима ружами, та викерчовац було барз чежко.
Керестурски теметов припада грекокатолїцкей парохиї и пресцера ше на 8 гольтох, та на тей велькей поверхносци вше єст роботи, окреме прето же дзепоєдни часци запущени, бо гроби нєт хто пораїц, бо нєт нашлїднїкох. Но, и там дзе их єст, вельо раз окрем пластичного квеца цо ше принєше на гроб, фамелия вецей нїч нє отримує.