БЕОҐРАД – Рукометни союз Сербиї меновал Сандру Колакович, дзивоцке Файфрич, за селекторку женскей сениорскей рукометней репрезентациї.
Сандра наша позната рукометашка, освоєла дзешец державни першенства у Югославиї, Сербиї и Чарней Гори. Можебуц ище баржей є позната як фаховец, була селекторка сербскей и чарногорскей репрезентациї рукометашкох.
Сандра Колакович походзи зоз барз познатей спортскей, а рускей фамелиї Файфрич. Єй оцец Петро Файфрич народзени у Беркасове 1942. року, (умар 2021. року у Шабцу) бул тиж познати рукометаш. У ствари, Петро Файфрич и Дюрдьовчань Силвестер Такач найвекши спортисти у рускей заєднїци, бо на Олимпияди обидвоме освоєли златни медалї (Петро як рукометаш у Мингену 1972, а Силвестер як фодбалер у Риме 1968. року).
Сандра народзена 1970. року у Вербаше, а перши роки дзецинства препровадзела у Червинки дзе єй оцец бавел за истоимени клуб. Перши крочаї у рукомету направела у Шабцу дзе ше Файфричова фамелия преселєла.
Заш лєм, найвекши спортски успихи витворела у Будучносци у Подґорици. Там и студирала, закончела економски факултет и постдипломски студиї на тему физичне воспитанє дзецох. Одала ше тиж за спортисту, єй супруг Иґор Колакович познати тренер, а бул и селектор одбойкашскей селекциї.