РУСКИ КЕРЕСТУР – Камерни хор „Звони” зоз Селенчи, внєдзелю, после Служби Божей, 7. децембра у Виронаучней сали керестурскей публики дали нєпреповедзено добре дожице.
Понеже того року после велїх рокох нє будзе крачунски концерт, пре нєвигодни условия у Доме култури, мож повесц же госцуюци хор, хтори основани 1993. року и дотераз мал вецей як 700 наступи у нас и у иножемстве, дал и вецей од обчекованого и же направел предкрачунску атмосферу.
Дириґент др Юрай Судї добре познати Руснацом, бо компоновал вельо композициї за нашо фестивали, а и хор хтори водзи наступал два раз на Емаус фесту, зоз духовнима шпиванками.
Того вечара хор привитал парох о. Владислав Варґа, визначуюци же нам екуменски стретнуца потребни же бизме ше баржей упознали и жили Божу любов.
Хор „Звони” шпивал богати репертоар духовних писньох на вецей язикох, публика окреме добре прияла Коляди, а шпивали и по руски.
