ЗАҐРЕБ (ГОРВАТСКА) – Манифестация „Днї українскей култури Заґреб – 2023” отримана у Високей школи за туризем и погосцительство у Заґребу початком октобра и тирвала два днї.
Першого дня отримана презентация кнїжки „Українци Горватскей: материяли и документи”, тиж и округли стол на теми: „90 роки Голодомору 1932–1933 у України” „Крочай по крочай до побиди и ошлєбодзенє України” и „Паметанє на Дмитра Павличка (1929–2023), народного героя України”. Отворена и вистава уметнїцких роботох фамелиї Маслик.
На музичним вечаре участвовали ґрупи зоз Заґребу, Риєки и Карловцу, як представителє Горватскей, а наступели и ґрупи зоз Словениї, Италиї, Босни и Герцеґовини, України и Сербиї. Зоз Сербиї наступала шпивацка ґрупа КУД „Иван Сенюк” з Кули зоз солистом Филипом Пронеком.
Положени и венєц на памятнїк Тараса Шевченка, дзе посадзена верба принєшена з Києва. З тей нагоди привитну бешеду отримал и предсидатель Союзу Руснацох Українцох Сербиї Боґдан Виславски, а предсидатель Националного совиту українскей националней меншини Сербиї Филип Пронек рецитовал твори Тараса Шевченка.
Другого дня, учашнїки манифестациї нащивели парк Зринєвац, дзе ше отримовала манифестация „Дзень националних меншинох Городу Заґребу”. У парку були столи з националнима єдлами, та було и руски и українски єдла. После того отримана литурґия у Грекокатолїцкей церкви святого Кирила и Методия.
На програми присуствовали и велї значни госци, а медзи нїма и амбасадор и перши секретар амбасади України у Заґребу Василь Кирилич и Виталий Максимив, професоре универзитетох з Києва и Ивано Франковска, спред Русинскей националней меншини у Заґребу Михайло Тимко, представнїки грекокатолїцкей церкви у Заґребу. Зоз Сербиї на манифестациї присутни були подпредсидатель Шветовей федерациї українских лемковских орґанизацийох и предсидатель Союзу Руснацох Українцох Сербиї Боґдан Виславски и Леона Виславски, и предсидатель Националного совиту українскей националней меншини Републики Сербиї и предсидатель КУД „Иван Сенюк” з Кули Филип Пронек.
Манифестацию „Днї українскей култури Загреб – 2023” орґанизовало Українске културно-просвитне дружтво „Кобзар” зоз Заґребу.
Представнїки Союзу нащивели и просториї Українскей националней меншини у Заґребу, а тиж и Українски и Русински дом у Вуковаре, дзе з домашнїма подзелели информациї о своїх активносцох и можлївосцох дальшого сотруднїцтва.
