СРИМСКА МИТРОВИЦА – У Театре „Добрица Милутинович“ всоботу, 7. децембра отримана традицийна Шветочна академия „Мацери Рускинї“ хтору Дружтво Руснацох у Сримскей Митровици орґанизує уж два децениї.
У уметнїцкей програми наступели Мишана шпивацка ґрупа „Руски соловеї“ под дириґeнтску палїчку Йованки Иванич, а на гармоники ґрупу провадзела Бранка Панич.
Александар Цундра виведол клавирски миниятури Лудовика Еунаудия, а зоз руску поезию ше представели Звонко Бeднар и Ясна Арбанас як и млади рецитатор Андрей Савичевич зоз писню „Хижочко стара“ Михайла Ковача.
Ивана Миросавлєвич Ференц и Оливера Милич Хиршер одграли сонату за ґитару и ґушлю Николи Паґаниния, а зоз двома шпиванками ше представел вокални ансамбл „Полифоника“ под руководством Йованки Иванич.
За драмску часц програми бул задлужени ґлумец Владимир Балащак хтори гуторел монолоґ о хлєбу зоз представи „Срим наша хижа“, а школярка Штреднєй музичней школи „Петар Кранчевич“ Исидора Козлина на флаути одграла композоцию Мирослава Штаткича „Скерцо“ на клавиру ю провадзел Александер Цундра.
Госци на програми були наймладши члени КПД „Иван Котляревски“ зоз Бикичу хтори одшпивали „У градочки шалата“ и „Мала баба три сини“ и одтанцовали дзецински танци зоз Горнїци, уметнїцка руководителька Любов Зейкан Бобаль, на гармоники грал Мирослав Майхер.
Академию провадзели предсидателька Одбору за образованє Националного совиту Руснацох Олена Папуґа, директор Заводу за културу войводянских Руснацох Саша Сабадош, парох у Сримскей Митровци о. Иґор Вовк и други.
Отворена и етно вистава „Ружи на хусточкох“ кустоски Музею Сриму Оливери Делич, а покровителє академиї, хтора була и увод до означованя националного швета Руснацох у Сербиї и централней преслави хтора будзе отримана у Сримскей Митровици 18. януара 2025. року, були Город Сримска Митровица, Национални совит Руснацох и Завод за културу войводянских Руснацох.
