Труд и упартосц ше вше виплаца

автор О. Русковски
237 Опатрене

Дохторе ше занїмаю з унапредзованьом чловекового здравя, зопераньом хороти, одкриваньом хороти, лїченьом хорих, а тото цо тим задатком заєднїцке то велька озбильносц и одвичательносц. З єдним словом, нєлєгка то драга, а окреме поволанє котре одвичательне за живот другого чловека. Єден з тих котри почувствовали тото поволанє и шмело крачаю по озбилньних драгох медицини то др Будимир Сабо-Дайко зоз Нємецкей

Наш собешеднїк народзени у Коцуре, дзе и закончел основну школу, ґимназию у Руским Керестуре, а потим ше уписал на Медицински факултет у Новим Садзе и 2012. року закончел студиї медицини. Шлїдзела робота у общей пракси, потим у швидкей служби у Вербаше дзе ше затримал найдлужей, алє жаданє специялизовац психиятрию го одведло до Нємецкей, до варошу Ґитерсло дзе и нєшка роби.

– Нємецки язик сом учел перше сам, на курсох, брал сом рочни одпочивки, бул сом вецей раз у Берлину дзе мам нину и братняка, и там сом ходзел на курси же бим ище лєпше звладал язик. Положел сом GoetheZertifikat B2 у Беоґраду и почал сом глєдац роботу – почина приповедку наш собешеднїк.

– Нє знал сом дзе почнєм, як почнєм, алє сом єдней аґенциї у Будапешту послал свою биоґрафию. Були ми понукнути три розгварки за роботу у Нємецкей, шицки три клинїки ми понукли роботу, а я ше одлучел за клинїку у варошу Ґитерсло, дзе сом видзел найвецей младих колеґох, а и сам варош дзе жию 100 тисячи людзе ме прицагнул. Паперолоґия була обсяжна и вичерпна, алє сом витирвал – гвари Сабо-Дайко.

Интересованє за психиятрию

У авґусту 2017. року Будимир почал робиц як госпитант, бо нє могол мац дозволу за роботу док нє положи медицински нємецки испит, алє могол буц там, учиц язик, а клинїка му шицко орґанизовала же би учел и рихтал ше за тот важни испит.

– Могол сом робиц самостойно, доставал сом плацу як и нємецки дохторе, алє моя диплома теди ище вше нє була припозната. Тото виєдначованє дипломи тирвало по 2019. рок, и аж теди сом постал  ровноправни з другима колеґами дохторами. Мам лиценцу як и шицки нємецки дохторе, одтеди самостойно робим, а час котри сом препровадзел на психиятриї ше ми раховало до специялизациї. На специялизациї сом бул у єдней велькей психиятрийскей клинїки хтора ма традицию длугшу як 100 роки.

Наша клинїка облапя и дньову клинїку, ма интернистичне и неуролоґийне оддзелєнє и  вецей як 300 посцелї. Шеф, алє и директор од `80. по `96. рок бул

др Клаус Дорнер, познати нємецки психиятер, єден зоз зачатнїкох социялней психиятриї. Велїх пациєнтох котри були длугорочно у клинїки одпущел, и теди ше у тим варошу розвила психиятрийска мрежа, дзе особи котри длужей хори нє мушели буц у шпиталю, алє бул циль же би самостойно жили кельо то можлїве. Були допатрани, алє мали векшу самостойносц през вецей програми и роботу котра им була присподобена. Ґитерсло ма найгустейшу психиятрийну мрежу у Сиверней Райни-Вестфалиї – гвари Будимир.

Специялиста, з вельку и озбильну драгу пред собу

У Нємецкей єст вельо установи дзе ше през дзень сходза таки пациєнти хтори сами себе помагаю, лєбо ше за нїх орґанизує програми, вилєти, з цильом же би ше злєпшало їх квалитет живота. Тиж, єст вельо самостойни пракси, психиятрийски и психотерапийски.

– Я тераз специялиста психиятриї и психотерапиї. Обидва обласци ме подєднак интересую, алє психотерапия у Нємецкей досц специфична. Нємци барз пишни зоз свою психиятрию, у ствари, вони значни у цалей историї психиятриї (Крепелин, Бройлер, Шнайдер, Ясперс…). Психотерапия припозната, а здравствене осиґуранє плаци пациєнтови одходи на психотерапию кед су им потребни. Єст три струї у психотерапиї, и кажде муши вибрац и у єдней ше специялизовац. Я ше пренашол у коґнитивней бихейвиоралней. Думам же то у нас нє барз розвите, нє так як у Нємецкей. А у Берлину ше каждого року отримує и найвекши шветови конґрес психиятриї, на котрим каждого року участвуєм. Барз добре же нєзависно од фармацеутских хижох орґанизовани семинари и преподаваня, дзе ше мож усовершовац у своєй обласци, котри и клинїка потримує. Так же, предо мну ище єдна длугока драга, сцел бим вельо того поробиц, и сцем ше далєй усовершовац у тим цо ме интересує и виполнює – гвари дохтор хтори свой шлєбодни час препровадзує у рижних спортох, друженю з пайташами, на путованьох…

На позициї главного дохтора

Як толкує, наш дохтор задовольни зоз клинїку, од початку му барз помагали. През цалу специялизацию клинїка орґанизовала семинари и програми котри му були потребни, ходзел на психиятрийски конґреси, а одношеня у клинїки барз добри. Так було по април 2023. року, кед Будимир постал висши, або главни дохтор. Гоч нє мал закончену специялизацию, клинїка препознала його закладанє и квалитет.

– Нє бул сом самостойни док сом нє закончел специялизацию, алє ме клинїка потримовала же бим цо швидше вошол до тей улоги. Пейц роки тирва специялизация, од того сом рок бул на неуролоґиї. У октобру 2024. року сом положел специялистични испит и одтеди самостойно водзим тото оддзелєнє  – толкує Сабо-Дайко и предлужує: – То оддзелєнє дзе хронїчни пациєнти, а з оглядом на тото же сом тераз и руководзаци кадер, робота вимага и нови обовязки. Одвитуєм за тото як ше лїчи тих пациєнтох, мам двох асистентох котри на специялизациї и за їх роботу и їх специялизацию сом тиж одвичательни. Вшелїяк, меркуєм и на интерес клинїки, як и же бизме добре комуниковали зоз другима главнима дохторами. И ту єст вельо бирократиї, вельо паперолоґиї, то Нємецка, и цалком друге чувство буц на тей позициї, як буц на позициї асистента – щири дохтор.

По Будимирових словох, було ту и културолоґийни розлики кед пошол до Нємецкей, гоч на клинїки єст вельо странцох, и зоз Сербиї и Чарней Гори, та заш лєм нє побановал же так одлучел. У тим краю дзе жиє му ше кус нє пачи яка хвиля, алє шицко друге ушорене, и праве так як думаме же у Нємецкей, так и є. А як гвари щиро – кед би бул нєзадовольни, нє остал би там робиц.

– Психиятрия дакус иншака як други конари медицини.  Стандардизована є як и шицки други науки, алє специфична по тим же кажди чловек иншаки и окремни, и то тото цо интересантне у психиятриї. Чловек ше може вецей або менєй пошвециц тому, а кед сце буц добри, муши ше цалком давац у тей роботи. У роботним чаше осем годзини ше велї чежки одлуки приноши, а же би ше пациєнта розумело, муши ше похопиц и обставини у котрих вироснул, окреме културолоґийни, социолоґийни и фамелийни у котрих жиє. Думам же психиятрия медицинска дисциплина котра найповязанша зоз филозофию, барз важне зоз другима бешедовац, зоз себе шицко вируциц и комуниковац. Стално черац думаня у тиму, зоз шестрами и психолоґами, тиж барз важне у психиятриї, и по тим ше розликує од других дисциплинох– толкує Будимир.

Пациєнти нє нательо стиґматизовани

На клинїки дзе Будимир заняти запровадзени  ґрупни терапиї, психотерапиї, роботни терапиї котри облапяю креативни терапиї пре чловеково коґнитивни функциї, же би бул цо активнєйши, а ту и терапиї з музику, з уметносцу…

– У Нємецкей нє нательо стиґматизовани пациєнти як у нас, а маме даскельо оддзелєня, за чежко хорих, оддзелєнє депресиї, за психосоматику, маме младих од 18 по 25 роки котри у окремней ґрупи… Клинїка подзелєна на три обласци – ґеронтопсихиятрия, хороти зависноци и обща психиятрия, а то моя обласц. Кажда ма специялизовани оддзелєня, а маме и окремну дньову клинїку дзе пациєнти дома шпя, алє приходза през дзень и участвую у програмох. Вельо ше на тим роби, та пациєнти котри ше нє можу о себе старац, доставаю од держави старателя, котри их представя пред законом. То лєм дочасово, контролує ше кажди пар роки, алє кажди тот кому потребна помоц, вон ю достанє гоч яки є хори. Вельо робиме и зоз фамелию же би була уключена и баржей розумела тоту хороту. Система барз добра, та вец задовольство и робиц – щиро гвари наш собешеднїк.

Шлєбодни час и розвага

– Звладал сом на Ибици сурфованє на води, у Горватскей сом тото усовершел, воженє на плахтарки ми тераз интересантне, та плануєм мац даяку плахтарку. Будзе то вироятно перша з руску заставу, и, розуми ше, нагода за нову розгварку – гвари през шмих наш собешеднїк хтори ше и озбильнєйше вожи на бициґли, а окрем лєтних, ту и жимски активносци…

– Ходзим до Австриї скияц ше, на сноуборд, уживам у тим цо любим, а патрим цо частейше нащивиц и свою фамелию у Коцуре, як и приятельох котри ту. Тиж, роздумуєм и о писаню докторскей роботи, и вшелїяк же то барз значни крочай. Вельо того сом виплановал, як на приватним так и на професийним плану, а кед добра дзека ту, верим же ше шицко сполнї и витвори найлєпше як лєм то мож – гвари на концу наш госц, Коцурец, др Будимир Сабо-Дайко зоз Нємецкей.

ПОВЯЗАНИ ТЕКСТИ