РУСКИ КЕРЕСТУР – У Руским Керестуре, тирва поставянє нового улїчного ошвиценя зоз цильом же би ше ушпоровало електричну енерґию, а обчекує ше же робота будзе закончена о мешац.
Место потерашнїх, обичних грушочкох на бандерох положени нови лед рефлектори, а ошвиценє будзе поставене у цалим валалє.
По словох секретара Месней заєднїци, Михайла Пашу, ошвиценє будзе помоцнєне на крижних драгох, опрез будинку Школи и дзепоєдних других институцийох, а новина и же на главней улїци, Маршала Тита рефлектори буду обрацени так же би ошвицовали и главну драгу и дражку попод хижи, за розлику од потерашнього ошвиценя хторе було обрацене лєм спрам хижох.
Здогаднїме, контракт о замени явного ошвиценя подписани концом новембра прешлого року медзи Општину Кула и приватним партнером. На тот завод гварене же Контракт о явним ошвиценю обезпечи векше шпорованє, лєпши квалитет ошвиценя и його отримованє у наиходзацих 15 рокох, а з тим проєктом залапена цала територия општини Кула.