КОЦУР – У церковней сали Грекокатолїцкей церкви Успения Пресвятей Богородици у Коцуре вчера рано, 8. януара, отворена вистава фотоґрафийох иконох Арсения Теодоровича.
Виставу отворела Єлена Перкович и присутним бешедовала о иконох котри ше находза на иконостасох у трох грекокатолїцких церквох у Сербиї и Горватскей, а котри концом 18. и початком 19. вику намальовал єден з найвизначнєйших малярох того часу Арсениє Теодорович. На фотоґрафийох представени и часци иконостасних преградох познатого новосадского древорезбара Арсения Марковича, а шицки фотоґрафиї направели Йоаким Ерделї и Нико Перкович.
Найвекша часц вистави пошвецена Грекокатолїцкей церкви св. Юря у Стойдраґи при Самобору у Горватскей, а на вистави представени и портрет владики Константина Станича, хтори тиж намальовал Арсениє Теодорович.
Фотоґрафиї настали у рамикох проєкту о двох спомнутих уметнїкох, маляра Арсения Теодоровича и древорезбара Арсения Марковича, и їх сотруднїцтве зоз грекокатолїками Крижевскей епархиї у 18. и 19. вику.
Проєкт реализовал тим Новинарскей асоцияциї Руснацох (НАР), а його реализацию оможлївел Завод за културу войводянских Руснацох.
