Указане як правилно хасновац дзецинске шедзиско у превозки

автор Д. Барна, фото: www.kula.rs
207 Опатрене

КУЛА – У сали Скупштини општини Кула, стреду 7. децембра отримана едукация о правилним хаснованю дзецинских шедзискох у превозки.  Викладанє тримали представнїки полициї, Совиту за безпечносц транспорту и Аґенциї за безпечносц транспорту, а було наменєне родичом дзецох до три роки старосци.

Шицких присутних на початку викладаня поздравел предсидатель општини Кула Дамян Милянич, котри визначел же локална самоуправа и Совит за транспорт на чолє зоз Карольом Валком и у будучносци буду порушовац таки викладаня, прето же превенция транспортних нєщесцох ключни фактор шицких учашнїкох у транспорту.

На викладаню були присутни родичи зоз местох општини Кула, медзи котрима и дзешецеро зоз Руского Керестура, котри мали нагоду упознац ше зоз правилним способом превоженя дзецох у превозки. У склопе едукациї приказане як треба правилно намесциц дзецинске шедзиско до превозки и як правилно вязац дзецко у шедзиску.

Совит за безпечносц транспорту општини Кула зоз потримовку локалней самоуправи и Аґенциї за безпечносц транспорту обезпечели безплатни шедзиска за дзеци присутних родичох, а по законченим викладаню шицки и достали по єдно дзецинске шедзиско.

ПОВЯЗАНИ ТЕКСТИ