БЕОҐРАД – Дня 27. септембра того року Сербска академия наукох и уметносцох сообщела же шє 25. септембра у 91. року живота упокоєл єй член Федор Гербут. Бул єден з наших найвизначнєйших фаховцох у обласци теорийней физики, медзинародно припознати по своїх винїмкових наукових досцигнуцох зоз обласци квантней теориї информациї и квантней механїки.
Федор Гербут ше народзел 2. мая 1932. року у Новим Вербаше, алє одроснул у Руским Керестуре, дзе му оцец бул адвокат и активни член РНПД. Физику дипломовал на Природно-математичним факултету у Беоґрадзе 1957. року, а по законченю основних студийох достал роботу як асистент у Институту „Борис Кидрич“ у Винчи. Як стипендист того института фахово ше усовершовал од 1960. по 1963. рок на Универзитету у Бирминґему (Анґлия) на Оддзелєню за теорийну физику под менторством познатого физичара Рудолфа Е. Пайперса, дзе и докторовал 1964. року.
Кед ше врацел до своєй держави, предлужує робиц у Институту „Борис Кидрич“, а 1976. року преходзи на Природно-математични факултет (ПМФ) Универзитета у Беоґрадзе. За дописного члена Оддзелєня за математику, физику и ґео-науки Сербскей академиї наукох и уметносцох (САНУ) вибрани є 1988, а за порядного члена 2003. року.
Польо науковей роботи академика Гербута облапяло основи квантней теориї информациї, виводзенє закона вироятносци у квантней механїки, идентични часточки, репрезентациї вектора стану двочасточних системох, антилинеарних Хилберт-Шмитових операторох, теорию мераня, квантну лоґику, интерпретацию релативних станох, як и применєну математику и математичну физику.
Його богата наукова библиоґрафия облапя вецей як 10 науково роботи обявени у фахових домашнїх и медзинародних часописох, вельке число наукових студийох и даскельо учебнїки, медзи котрима ше видвоюю Квантна механїка за виглєдовачох І и ІІ, котри зоз своїм визионерским змистом и облапносцу постали єдна з найзначнєйших наукових публикацийох на сербским язику и поставела фундамент Беоґрадскей школи квантней механїки.
Гербут бул стаємни член Медзинародного здруженя математичних физичарох (International Association of Mathematical Physicists), як и Видавательного совиту домашнього наукового часопису Теки физичних наукох СФИН.
Лауреат є Награди Института „Борис Кидрич“ за найлєпшу наукову роботу 1968. року.
Зоз свою наукову и педаґоґийну роботу дал вальке доприношенє розвою теорийней физики.
Його одход представя вельку утрату нє лєм за Сербску академию наукох и уметносцох и всевкупну науку, алє и за нашу руску заєднїцу, зоз чиїх шорох походзи. О його науковей роботи и педаґоґийней дїялносци у свой час була упозната и руска национална заєднїца прейґ „Руского слова“, прейґ „пирка“ новинара Михайла Симуновича.