РУСКИ КЕРЕСТУР – На керестурским теметове вчера похована Наталия Папгаргаї Малацко котра ше 7. януара упокоєла у своїм 77. року живота, длугорочна и перша школована библиотекарка у своїм валалє.
Народзена є 3. децембра 1948. року, од оца Дюру и мацери Маґдалени (дзивоцке Роман), як младша шестра Дюру Папгаргая нашого всестраного културного дїяча и писателя. Основну школу закончела у Керестуре, а штредню фахову за библиотекара у Беоґрадзе.
Такой достала роботу у своїм валалє у библиотеки як перша фахово школована особа за тоту роботу, а медзи першима и у општини Кула. То було 1967. року док валалска библиотека робела у составе ЗЗ „Перши май” на месце нєшкайшого ресторану у центру. Потим ше Библиотека зоз читальню 1975. року селї до просторийох Дому култури у будинку на углє улїцох М. Тита и Русинскей. Папгаргайова Малацкова и далєй там занята, а Библиотека там робела по 1988. рок. Од 1989. по 2000. рок преселєна є до будинку Замок дзе Папгаргайова Малацкова и закончела свой роботни вик як библиотекарка.
Треба визначиц же у чаше док Народна библиотека зоз читальню робела у просторийох Дому култури то були златни часи за читательну културу у тим нашим валалє. Членох теди рочнє було и до 500, а библиотекарка Папгаргайова Малацкова дала свойо вельке доприношенє. Популарна була и читальня, а библиотекарка орґанизовала велї литературни вечари и стретнуца зоз писателями дзе попри наших руских, госцовали и теди найпознатши писателє Югославиї, як Десанка Максимович, Любивоє Ршумович, Душко Трифунович и велї други. У библиотеки свойо стретнуца отримовали и младежска литературна секция дзе дорастали нашо будуци писателє як Наталия Дудаш, Юлиян Надь и други.
Вичная єй памят!