Вишла децемберска „Заградка” и забавна вифарбйованка

автор М. Зазуляк Гарди
293 Опатрене

НОВИ САД – Вишла децемберска „Заградка”, а зоз ню и дарунок – забавна вифарбйованка, хтору направела илустраторка Александра Русковски.

Рубрика Госци и новосци пише о тим цо ше случовало прешлого и того мешаца, а Сцеме знац и упознац представя першонаградзени дзеци на Конкурсу „Заградков 75. родзени дзень”, як и тих хтори достали награди за заєднїцку роботу. Обявени и мена шицких хтори участвовали на Конкурсу, а у тим чишлє мож дознац и хтори дзеци достали другу награду, а хтори буду представени у януарским чишлє.

У Читальнї приповедки зоз нових кнїжкох за дзеци Владимира Дудаша Иванового „Гибайце ше бавиц” и Цецилиї Мудри „Гунцут”, док Мала заградка понука писньочки зоз новей сликовнїци „Животинї” Наташи Еделински Миколка, як и квизчок на тоту тему.

Дзецински литературни и подобово роботи и у тей „Заградки” обявени у вецей рубрикох, а у рубрики „Заградков 75. родзени дзень” интересантни задаток зоз Заградковей архиви. Солмизация дава ноти и текст єдней коляди, док рубрика Мудро и безпечно пише о парняцким насилстве на интернету.

ПОВЯЗАНИ ТЕКСТИ