НОВИ САД – Найпопуларнєйша и найчитанша руска кнїжка Руски християнски календар, хтора у континуитету виходзи од 1921. року, тих дньох вишла з друку.
Тогорочни Календар, як и предходни календари вишол у сотруднїцтве НВУ „Руске слово” з Нового Саду и Християнского часописа „Дзвони” з Руского Керестура, а з благословом и посланїцу преосвященого владики кир Георгия Джуджара.
У тогорочней посланїци наш владика пише о ювилейним святим 2025. року, хтори символично почнє зоз отвераньом святих дзверох у церкви святого Петра у Риме. Традицийно за ювилейни ше преглашує кажди 25 рок, а винїмково ше може преглашиц и надзвичайни ювилейни святи рок.
Календар направени у складзе зоз узвичаєну концепцию по хторей ше жада облапиц ширши дияпазон културних и вирских подїйох хтори уплївую на очуванє нашого идентитета, як вирского, так и националного. Анализує ше роботу Националного совиту, як и важни подїї з обласци култури и образованя.
Понеже за нами богати видавательни рок, обявени виривки зоз обявених кнїжкох же би ше обрацело увагу на нови наслови, а єст и литературни тексти писани специялно за Календар. Приношиме и интервю зоз доц. др Ану Римар Симунович, шефом Оддзелєня за русинистику.
У Календаре єст написи о важних рочнїцох и ювилейох, як и интересантносци з нашей прешлосци. Календар пише о Руснацох у Горватскей, представя фамелию Биндасових з Нового Саду. У привредней рубрики напис о активносцох Польопривредней служби Зомбор як и заключенє историйней анализи задруґарства и ПК „Перши май” у Руским Керестуре. Ту и порядна рубрика о важних спортских случованьох, як и блок розваги и гумор. Календар обявює фотоґрафиї зоз першей причасци по наших парохийох, и зоз других церковних и културних подїйох. Тиж так, ту и здогадованє на визначних Руснацох цо нас зохабели у предходним року.
Руски християнски календар, по цени од 500 динари мож купиц при наших колпортерох по наших местох, у представительствох НВУ „Руске слово” – у Новим Садзе на адреси Футожска 2, ІІІ поверх (од 9 по 14 годзин) телефон 021/6613-697; у Руским Керестуре у будинку дакедишнєй Друкарнї на 2. поверху и на телефон 025/5100383 або 025/703-311 (од 9 по 14 годзин), як и на дзепоєдних парохийох.