КОЦУР – У церковнй сали Церкви Успения Пресвятей Богородици у Коцуре, нєшка 8. януара, на 8:30 годзин, з нагоди крачунских шветох, будзе отворена вистава фотоґрафийох иконох, хтори за грекокатолїцки церкви намальовал Арсениє Теодорович.
На вистави буду икони чийо фотоґрафиї направели, Йоаким Ерделї и Нико Перкович, а висликовани су на иконостасох у трох грекокатолїцких церквох, двох у Сербиї и єдней у Горватскей. Икони намальовал, концом 18. и початком 19. вику, єден з найвизначнєйших малярох того часу Арсениє Теодорович. Тиж так на фотоґрафийох и часци иконостасних преградох хтори виробел познати новосадски древорезбар Арсениє Маркович.
Фотоґрафиї иконох настали у рамикох двох повязаних проєктох о двох Арсенийох и їх уметнїцким сотруднїцтве зоз ґрекокатолїками Крижевскей епархиї, а проєкт реализовал тим Новинарскей асоцияциї Руснацох (НАР).
На вистави з найвекшей часци фотоґрафиї котри ше одноша на Грекокатолїцку церкву св. Юря у Стойдраґи при Самобору у Републики Горватскей, за чиї ше иконостас нє знало хто авторе. Тиж так на вистави будзе презентовани и портрет владики Константина Станича, хтори намальовал тиж Арсениє Теодорович, цо историчаром уметносци по тераз нє було познате.
Виставу отвори Ирина Гарди Ковачевич. Реализацию оможлївел Завод за културу войводянских Руснацох.