Вєдно през живот, вєдно у пензиї

автор Ол. Живкович
223 Опатрене

Ксению и Михайла Бодянцових познаю велї людзе у валалє, алє и ширше. Ксению велї волаю Блаженка, бо и то єй мено. Робела у школи „Петро Кузмяк” як учителька, а Михайло як орґанизатор у Доме култури. Вона учела дзеци, ґлумела, режирала, вон шпивал, грал, ґлумел… До пензиї Михайло пошол пред трома, а Ксения пред двома роками.

Михайло того року означує два значни ювилеї у своїм живоце:

– Того, 2025. року прешло 60 роки од мойого першого явного наступу и 50 роки одкеди активно участвуєм у културним живоце Руснацох, цо подрозумює наступи на концертох, знїманя у Радию и Телевизиї, як и роботу у орґанизациї наших манифестацийох, односно, фестивалох. Дочекал сом першу можлївосц за одход до пензиї и кед сом наполнєл 65 роки живота и 43,5 роки роботного стажу, 10. мая, пред трома роками, та сом и пошол до пензиї. И з єдним словом, можем повесц, добре ми у нєй! –почина Михайло бешедовац о роботи, о тим як наступал и о госцованьох. У Доме култури гвари же була окремна робота, бо ше вельо раз наступало, путовало зоз ансамблом и то ище теди кед то могло. А ансамбл бул квалитетни, водзел го Юлиян Рац (тераз у Канади), Михайло бул руководитель, а Йоаким Рац хореоґраф.

– Як музичар сом госцовал у 12 европских державох, у шицких  републикох и покраїнох бувшей Югославиї. У велїх державох сом бул госц и по вецей раз – цеши ше Михайло, бо з того занавше остали велї красни памятки.

Велї познаю Михайла и як музичара котри мал свойо оркестри зоз котрима приватно наступал. Но, верим же нє знаю же, кед ше престал активно занїмац зоз музику, дзешец роки робел и ґрафични дизайн, аж и приватно попри роботи и за єдного видавателя пририхтовал кнїжки за друкованє, так же ма поробено коло 70 наслови.

– Як пензионер, з музику ше вецей активно нє занїмам. Ту и там ме поволаю до Дому култури до даякей музичней комисиї и за Фестивал „Червена ружа” до жирию, дакеди их треба посовитовац и порадзиц. Анґажовани сом у РНТ „Петро Ризнич Дядя”, понеже ґлума була моя перша любов ище у вчасней младосци. Понеже превагла музика, нє було часу и простору за театер. После 50 рокох одсуствованя зоз театралней сцени, ознова сом ше врацел до театру и бавел у двох остатнїх представох. То нє лєм же ми виполнює час, то праве задовольство –  гвари вон.

Буц учителька найкрасше поволанє

У фебруару будзе два роки як Ксения пошла до пензиї. Толкує же гоч урядова назва єй професиї – професорка класней настави, найволєла буц учителька и гвари же то найкрасше поволанє.

До школи Бодянцова прията 1988. року, а кед наполнєла 35 роки роботного стажу и мала вецей як

63 роки живота, мала и обидва условия же би влонї, 1. фебруара, пошла до пензиї.

– Учителька може злєпшац живот дзецом котри учи – почина наша собешеднїца о роботи, о тим цо нєшка уж за ню.

– За тот свой роботни вик у школи думам же сом мала коректне одношенє и ґу школяром и ґу родичом. Гоч, вше сом гварела, же нє може єдна учителька одвитовац анї шицким школяром, а анї родичом. Наздавам ше же сом нїкого нє очкодовала и ше трудзела дац шицко од себе. Гей, мило ми же сом нє мала конфликти зоз родичами. Цо вони о мнє думали, я нє знам, алє зме ше вше могли порадзиц. Думам же сом до каждого школяра уткала часточку себе –  гвари вона.

Баба и дїдо

Ксения и Михайло маю двойо дзеци, Таню и Владимира. Обидвойо одроснути, вишколовани, порозходзели ше по швеце. Таня зоз супругом и двоїма дзецми, Лейлу и Яником, жиє у Канади.

– Роздалєносц медзи нашима дзецми и нами ми покус проблем, бо нам хиби тото одношенє зоз унуками понеже су нє ту. Сцел бим спомнуц лєм єдну анеґдоту: Мой колеґа раз на роботи гварел: „Ище мушим и по унука исц после роботи.” Одвитовал сом му же нє зна цо би я дал кед бим могол пойсц по унука до оводи. Но, пре модерни технолоиї ми ше, заш лєм, часто видзиме, з часу на час пойдземе и до Канади, алє нам хибя – толкує Михайло, а Ксения дополнює:

– Кед видзиме же ше други баби и дїдове шпацираю по парку и по валалє зоз унучатми, гоч нашо уж векши, волєли бизме кед би були блїжей. Вельо раз бешедуєме о тим кельо зме того попрепущовали прето же зме нє могли видзиц як унучата росли, як почали ходзиц, яки им бул перши дзень у школи… Заш лєм, маме памятки котри зме дожили вєдно кед зме були у Канади, або кед вони були у Керестуре. Дацо зоз каждоднього живота нас здогадує на нїх, та вец о тим бешедуєме же як Яни, наприклад, дацо поробел, кед Лейла дацо гварела и то нас отримує – гвари Ксения.

Шлєбодни час

О тим цо то шлєбодни час у пензиї, Ксения и Михайло анї нє роздумую.

– Нє мам проблем зоз шлєбодним часом у пензиї. Слухал сом од велїх же кед престали робиц же спадли до якейшик файти депресиї. Робота котру я робел була напарта, алє без одредзеного роботного часу. Так же, ошлєбодзел сом ше тей напартосци, того стресу. Тераз обидвойо робиме кеди сцеме, кельо сцеме, нє понагляме, а сцигнєме вшадзи.

Ксениї ше єдна колеґиня опитала пред одходом до пензиї же цо будзе робиц, цо планує…

– Нє мам плани, за розлику од тей моєй колеґинї котра нє знала чи ше єй уда шицко витвориц цо виплановала праве у пензиї. Нє така сом орґанизована особа, орґанизация ми тераз флексибилна, шмеє ше Ксения и предлужує:

– Любела сом робиц у школи и нє пошла сом зоз думку: ,,Яй, слава богу же сом пошла!” Пошла сом бо сом сполнєла условия, пришол мой час за тот период у живоце и я тераз шлєбодна. Єдна зоз моїх нових активносцох то же сом пременєла костиранє, дакус вецей уваги обрацам на саму себе и на мой здравствени живот. Вельо читам кнїжки котри ме заинтересовали, праве о здравю. Духовно ше полнїм, то ме змирює и опущує. Маме и заєднїцки ексурзиї, кед нам ше сце, пойдземе на вилєти вєдно на яки зме пред тим нє ходзели. Ми роздумовали о тим же док будземе у пензиї же чи себе нє допиєме, а видзи ше нам же зме якош баржей повязани, та и вшадзи вєдно идземе. Дакеди я пойдзем до пайташки, а Мижо ходзи на проби. Розумиме ше, дополнюєме, а маме и свойо обовязки и потреби котри кажде окреме сполнює. На Ксенийово слова Михайло дополнює:

– Кельо раз лєм ше случи же єдно дацо дума, а друге пове тото цо перше думало, насампредз, ше вельо лєпше познаме.

Ксенийово упечатки

– Одход до пензиї позитивно вплївовал на мнє. Кажде хто чесно одроби свою роботу з любову, думам же кед придзе тот час за пензию, вец то просто природни цек. Думам же сом дала шицко од себе и кед ше закончел тот период, просто ше єдна етапа мойого живота закончела. Но, отворел ше други облачок, други дзвери. Я вше була позитивна, гоч у живоце єст рижни збуваня, и кажди чловек би ше требал намагац думац позитивно. Дзвиганя и паданя состойна часц живота. Нє ганьба спаднуц, ганьба ше после того нє двигнуц.

Вше сом любела вежбац и пре одредзени причини тераз ище нє можем у тим активно участвовац, алє бим любела вєдно зоз женами мойого возросту у тим участовац. Накадзи сом годна, дораз и я з нїма у сали – гвари Ксения.

Михалово активносци

– Я, наприклад, любим фодбал. Нє нательо тот професийни, алє любим провадзиц наш керестурски ФК „Русин”, та обовязно ходзим кажду нєдзелю кед бавя у Керестуре, алє боме идзем и индзей кед бавя. Я нє даяки загрижени навияч, алє видзем дзешка и стретнєм людзох. Можем повесц же квалитет фодбалу у лиґох у котирих бави Русин нє вельо заостава за професийним. То щире бависко, нєт нїяки тарґовини, бависко з души. Ту нам блїзко и Спортска гала, та часто пойдзем провадзиц и змаганя рукомету, любим тот аматерски спорт – гвари наш собешеднїк.

ПОВЯЗАНИ ТЕКСТИ