КОЦУР – У просторийох Подручней канцелариї Националного совиту Руснацох у Коцуре пияток и всоботу, 13. и 14. децембра, отримани интересантни активносци под назву „Жатвово єшеньски роботнї”.
Отримани проєкт ше други раз реализує у орґанизациї КУД „Жатва”, а финансовало го Роботне цело за младих Националного совиту рускей националней меншини.
По словох предсидательки коцурскей „Жатви” Меланиї Мали, того року заплановане же би ше роботню отримовало даскельо днї, та активносци подзелєни на пияток и соботу.
Першого дня роботнї млади дзивки котри заинтересовани за вишиванє указали присутним тоту схопносц, а було и таких котри уж були упознати зоз вишиваньом, та медзисобно помагали єдна другей.
Другого дня роботнї час бул резервовани за тото же би ше започати вишиванки приведло ґу концу.
Таки и подобни проєкти интересантни младим, гварела Малийова з тей нагоди, а сход вихасновани и за друженє и бешеду о интересованьох котри млади маю и случованьох яки би могло орґанизовац у наиходзацим периодзе у Коцуре.
