ОДЖАК – У Оджаку отримани традицийни поволуюци турнир ,,Златна песц”, на хторим участвовал и Карате клуб ,,Русин” и зазначел красни резултати.
КК ,,Русин” на тим змаганю участвовал зоз тринац учашнїками, а треба надпомнуц же ше на тим змаганю по першираз зоз тей ґенерациї двойо учашнїки змагали у борбох.
Шицки учашнїки зоз Керестура цо ше змагали у робеню катох достали медалї, а у катеґориї борбох, София Чуни завжала треце место, а Стефан Такач завжал друге место.
У катох ше змагали: София Чуни, Кристина Гарвильчак, Лина Папуґа, Матеа Бучко, Милица Джакула, Миа Сабо, Виктор Шимко, Дориян Попович, Анета Попович, Иван Чапко, Феликс Ковач и Ваня Премович.
У катеґориї борбох участвовали двойо учашнїки, София Чуни и Стефан Такач.
На турниру у Оджаку участвовали петнац клуби и було коло 300 учашнїкох.
КК ,,Русин” планує участвовац ище на даєдним турниру пошвидко, понеже пред конєц рока заплановане покладанє за паси, же би у идуцим року було ище векше число змагательох у борбох.
Поволуюци турнир у Оджаку орґанизовал КК ,,Мадосц” зоз Оджаку.
