РУСКИ КЕРЕСТУР – Зоз Здруженя за помоц ментално нєдостаточно розвитим особом (МНРО) „Белава птица” у Кули, обвисцую гражданох Руского Керестура о своєй услуги хтора ше одноши на помоц у обисцу пензионером и старшим особом, а хтору маю можлївосц хасновац шицки жителє кулскей општини.
Услуга наменєна особом хтори остарели, ослабли або су хори, а зоз помоцу здравствених роботнїкох у „Белавей птици”, маю можлївосц цо длужей остац у своїх обисцох и одцагнуц одход до Дому за старих.
Услуга подрозумює приношенє вареного єдзеня раз на дзень, помоц у пораєню обисца, помоц у преблєканю и купаню нєрухомих особох хтору окончую особи за допатранє, а под напатрунком висшого роботнїка.
Окремни роботнїк задлужени за преценьованє помоци, збера нєобходну документацию и на основу того прави индивидуални план роботи спрам хторого ше потим ускладзує цо поєдинцови потребне, а цо Здруженє може понукнуц.
Цена услуги завиши од приманьох.
Спомнута услуга у рамикох Здруженя иснує од 2019. року, хасновательох єст зоз шицких местох кулскей општини.
Заинтересовани з Керестура ше можу явиц на число 064/11-26-347 лєбо на фиксни телефон Здруженя 724-177. Волац мож кажди роботни дзень од 8 по 14 годзин.