РУСКИ КЕРЕСТУР – У парохиї св. отца Миколая прешлого тижня було живо и весело у християнскей заєднїци. Октобер то мешац молитви до Пречистей Дїви Мариї, молитви дзецох за мир и и мешац пошвецени старим.
З початком октобра каждого вечара пред Службу Божу ше модлї пацерки бо октобер мешац Пацеркох, през „Ружанєцˮ вирни ше обрацаю до Пречистей Дїви Мариї. Од початку октобра, пондзелково вечарши Служби ше служа у Старим манастире.
Святийши отец папа Франциск замодлєл вирних же би ше 17. октобра вєдно помодлєли за мир и же би того дня за тото намиренє и посцели. Так було и у нашей парохиї.
На дзень кед милион дзеци у швеце модля єдинство и за мир у швеце, 18. октобра, шестра Авґустина Илюк, СНДМ, пририхтала дзеци же би ше того дня у храме вєдно помодлєли за тоти намиреня. Пред тим им пояшнєла яка то молитва „Ружанцуˮ, як ше модлї, у чим дзеци дзечнє участвовали, аж на концу остатню дзешатку и одшпивали. Парох керестурски о. Владислав Варґа их поблагословел и подзековал им на щирей молитви. Вєдно зоз парохом керестурским о. Варґом, тому збуваню присустовали и помоцни капелан о. Михайло Шанта и о. Ярослав Варґа.
Штварток, 19. октобра од 14 по 17 годзин у виронаучней сали Каритас орґанизовал уж традицийни Бал за старши особи. На нїм ше стретли старши вирни зоз Кули, Коцура и Руского Керестура. Пригодну закуску и интересантни змисти порихтали волонтере Каритасу, а парох керестурски их привитал и вєдно зоз о. Ярославом Варґом и о. Платоном Салаком , ЧСВВ, подзелєл радосц друженя.
