РУСКИ КЕРЕСТУР – У Основней и штреднєй школи „Петро Кузмяк” вчера означени 21. фебруар, Медзинародни дзень мацеринского язика, та з тей нагоди школяром викладанє отримала професорка руского язика Сенка Бенчик зоз Основней школи „Чаки Лайош” зоз Бачкей Тополї.
Бенчикова на интересантни способ бешедовала о гунґаризмох у руским язику цо у ствари була и єй мастер робота на Катедри за руски язик, литературу и културу. Рушаюци од думки Михала Ковача же чуваюци свой язик чуваме и свою народносц, Бенчикова школяром помогла освидомиц же цо то пожичка у язику, кеди є оправдана, а кеди нє, и од котрих ше мушиме мерковац и чувац.
Викладаня були у двох ґрупох – перше школяром седмей и осмей класи основней школи, а потим и ґимназиялцом руских оддзелєньох, а Бенчикову привитали и представели домашнї наставнїци руского язика Каролина Папуґа и Люпка Малацко.
У школским голу з нагоди Дня мацеринского язика виложени панои хтори пририхтали школяре пиятей и шестей класи зоз своїма наставнїцами руского язика.