Пиятоклашнїком од септембра три нови предмети

автор ртв  фото тах
643 Опатрене

БЕОҐРАД – Будуци школяре пиятих класох од нового школского року буду мац три нови предмети – „информатика и рахункарство”, „технїчне и технолоґия” и „физичне и здравствене воспитанє”.

Кед будзе прилапене нове предкладанє наставного плану за старши класи основних школох, дотерашнї виборни предмети, як цо то „чуваре природи”, „каждодньови живот у прешлосци”, хор и оркестер – за нїх буду звонканаставни школски секциї.

На вимогу Министерства просвити, науки и технолоґийного розвою, Завод за унапредзенє образованя и воспитаня за нєполни штири мешаци принєсол пременєни и осучаснєни план настави за други циклус основного образованя.

– „Информатику” як обовязни премет зме запровадзели у пиятей класи з єдну годзину тижньово, зоз змистами хтори опарти на програму виборного предмету „информатика и рахункарство”, хтори прешлого року прилапел Национални просвитни совит. Предмет „технїчне и информатика” постанє „технїка и технолоґия – гварела помоцнїк директора Заводу за унапредзенє образованя и воспитаня Ґордана Миятович.

Вона додава же з бувшого „технїчного и информатики” висцерана инфроматична часц, бо инфорамтика и рахункарство поставаю окремни предмет.

– Пражнїна дополнєта зоз змистами з хторима ше стимулує розвой поднїмательства як медзипредметней компетенциї, з чим осучаснєна настава технїки и технолоґиї – додала Миятовичова, як и же „физичне воспитанє” прерошнє до „физичного и здравственого воспитаня” з двома годзинами тижньово.

„Вибрани спорт”, терашня треца годзина „физичного”, преходзи до звонканаставних активносцох. На його место уходзи „информатика”, так же дзеци нє буду мац вецей годзини як дотераз, прешвечую компетентни.

ПОВЯЗАНИ ТЕКСТИ