ВЛАДИМИР КИРДА БОЛХОРВЕС народзени 1. октобра 1942. року у Руским Керестуре. У родним валалє закончел основну школу (1957) и шлосерске ремесло (1960). У Новим Садзе закончел Висшу технїчну машинску школу (1964). Дипломовал (1983) на Економским факултету у Суботици.
У Беоґрадзе, на Факултету политичних наукох, на напряме социолоґия култури и културней политики одбранєл (1994) маґистерску тезу Културно-социолоґийни аспекти критики доґматизма у югославянским романє 1985–1988.
Од 1976. до 2003. року службовал (углавним на роботним месце редактора зложених емисийох) у Рускей редакциї Телевизиї Нови Сад.
Член є Дружтва писательох Войводини од 15. януара 1975. року.
Нєшка є у Новим Садзе формално пензионер, а фактично творитель котри чита и пише интензивнєйше як скорей. Потераз обявел седем томи свойого геутеранистичного-белетристичного венца ,,Шнїюци гвизду Геутераниї”.