Александар Паланчанин як колеґа вше бул винїмково коректни, новинарску роботу окончовал совисно од першого по остатнї дзень, а нашо одличне сотруднїцтво тераз заокружене и з тоту награду. Як коруну його новинарскей кариєри вшелїяк треба визначиц моноґрафию „100-рочнїца Фодбалского клубу Русин”.
Александар Паланчанин лауреат награди „Рускoгo слова” за професийносц и квалитет у роботи, пошвеценосц Установи, професиї и етики, як и колеґиялносц и обще доприношенє колективу и дружтву, за период од 2020. по 2025. рок. На предклад главней редакторки новинох „Руске слово” Олени Планчак Сакач, Александар Паланчанин, донєдавна редактор рубрикох Спорт и Тижньовнїк, достал награду редакциї Тижньових новинох „Руске слово” з нагоди ювилея Установи.
– Новинарство то професийна поволанка за хтору потребне каждодньове превипитованє системи вредносцох, и єдна є з ридких професийох хтора ше у своєй роботи муши притримовац новинарского Кодексу. Свою 38-рочну кариєру у нашей Хижи, Паланчанин заокружел зоз єдну замерковану публикацию пошвецену спорту. Як длугорочни редактор тей рубрики обявел кнїжку „100-рочнїца Фодбалского клубу Русин” богато илустровану зоз фотоґрафиями, хтора остава його вични шлїд.
Паланчанин як колеґа винїмково коректни, новинарску роботу окончовал совисно од першого по остатнї дзень, а нашо одличне сотруднїцтво тераз заокружене и з тоту награду – визначела главна редакторка новинох „Руске слово” Олена Планчак Сакач.
Александар Паланчанин, хтори початком 2025. пошол до пензиї, визначел же за ньго награда вельке припознанє, насампредз, прето же ю достал з нагоди ювилея 80-рочнїци, алє и зато же бул єден од новинарох у перших сто рокох хтори участвовали у писаню на руским язику. Тоту награду Паланчанин поровнал зоз животну награду.
– Вистка же сом лауреат того велького припознаня ме приємно нєсподзивала. Насампредз прето же сом нє обчековал таку чесц. Поправдзе, тото припознанє було додзельоване и по тераз, алє го доставали заслужнєйши. Можебуц лєпше поведзене, доставали го колеґове хтори мали вецей искуства и призначели визначни резултати през вецей роки у новинарстве у „Руским слове”. На самим концу мойого активного роботного вику, пришол шор и на мнє. Праве прето, награда ми барз значи, бо вона на єден своєродни способ валоризує мою роботу. Без фалшивей скромносци, шицки любиме кед нас дахто явно похвалї и додзелї нам припознанє за посцигнути резултати у роботи. У моїм случаю, вшeлїяк же награда ище єден мотив же бим предлужел на таки способ писац, а можебуц и робоц дацо инше – гварел Александар Паланчанин.
Од 1987. до 1990. року Александар Паланчанин бул редактор младежского часопису МАК, а од 1995. року дописователь у новинох „Руске слово” зоз Вeрбасу, Кули и Нового Саду. У периодзе од 1995. по 2000. рок ушорйовал политичну рубрику у новинох „Руске слово”, сотрудзовал на Радио-телевизиї Нови Сад, як и приватней телевизиї Панония, а од 2005. по 2010. рок у НВУ „Руске слово” бул маркетинґ менаджер. Од 2010. року, та по одход до пензиї ушорйовал рубрики Тижньовнїк и Спорт у новинох „Руске слово”.
Александар Паланчанин на Факултету политичних наукох у Заґребе закончел журналистику 1990. року, а цали роботни вик препровадзел у Новиско-видавательней установи „Руске слово”.