Мено и презвиско: Никола Сивч

Гласовни ґлумец

Зоз чим ше точно занїмаш?

Пожичуєм свой глас юнаком у рисованих филмох. Я тот чловек хторого чуєце кед ваш юнак бешедує на телевизиї.

Яку школу треба закончиц же би дахто могол робиц як гласовни ґлумец?

Гоч Факултет драмских уметносцох велька предносц, нє мушице го закончиц, прето же вам найпотребнєйши талант, дзека и любов ґу тей роботи.

Яки ше там предмети учи?

Дикция, ґлума, гласовна технїка.

Дзе гласовни ґлумци можу робиц?

Радио, телевизия, аудио продукция рекламох и аудио кнїжкох.

Цо шицко треба знац кед сцеш буц добри гласовни ґлумец?

Гоч глас треба же би мал красну фарбу, од того важнєйша барз, барз добра дикция. Муши ше знац и справовац опрез микрофона и дихац правилно.

Одвше ши сцел робиц праве тоту роботу и чи ши и як дзецко любел имитирац гласи?

Любел сом имитовац гласи, алє кед сом як дзецко на телевизиї видзел знїмок як Никола Симич у студию роби синхронизацию Душка Дуґоушка, теди сом знал же єдного дня будзем на його месце.  

Як ши похопел же маш талант за тоту роботу?

Одмалючка сом мал вельки спектер гласовних трансформацийох, алє сом насправди похопел же мам талант кед сом робел як водитель на радию.

Цо найкрасше у тей роботи?

Же ши теди заш дзецко. Зоз кажду нову улогу упознаш нового себе.

А цо найчежше?

Знїманя дакеди тирваю и пейц годзини, та ше и глас зна дакус витрошиц.

Як випатраю знїманя?

Перше войдземе до глухей хижи (студия) у хторей ше находзи екран на котрим патрим рисовани филм, потим микрофон, слухалки и сценарио по сербски и горватски. Режисер ми през облак гутори цо мам робиц, та вец бешедуєм источашнє кед и мой юнак у рисованим бешедує. Кед дацо нєдобре, вец повториме тоту часц.

Яка особа треба же би була кед сце буц добри гласовни ґлумец?

Муши мац мотивацию, любов ґу тей роботи, добру дикцию и спонтаносц.

Мушиш ношиц даяки окремни шмати на роботу?

Нє. Нє потребна нїяка униформа. Яки шмати ношице дома, таки придзеце и на знїманя.

Хтора подоба з рисованого филма ци облюбенa хторей ши давал глас и хтори рисовани филм?

Браца Далтон („Талични Том”), медo Шалабайзерич („Jellystone”) и пчолка Барнаби („Лу и бучна дружина”).

Кому биш любел давац глас?

Душкови Дуґоушкови, Микийови Маусови.

Цо биш поручел дзецом хтори сцу постац гласовни ґлумци док вирошню?

Лєм будзце упарти и чувайце дзецко у себе и док вирошнєце. То найважнєйше.