Отворена купалїщна сезона на жимским базену у Вербаше

автор ол. русковски, фото www.vrbas.net
365 Опатрене

ВЕРБАС – По законченю лєтнєй купалїщней сезони, Центер за физкултуру „Драґо Йовович” у Вербаше за шицких заинтересованих нащивительох отворел свой жимски базен.

За гражданох базен отворени кажди дзень у вецей терминох, алє и за плївацки клуби котри хаснователє того спортского змисту. Тиж, у сотруднїцтве зоз основнима школами, плановане же би ше предлужело обучованє нєплївачох, котре у предходним периоду нє було запровадзоване пре епидемийни причини.

Температура води у жимским базену нєпреривно помедзи 27 и 29 ступнї целзиюса, визначели компетентни. У марцу того року закончени роботи на заменьованю дзверох и облакох и ушорйованю фасади, цо створело значно лєпши амбиєнт и условия за пребуванє купачох на жимским базену.

Термини за нащивительох остали нєпременєни – през роботни днї доступни три термини, и то ранши од 6 до 7,30, потим од 17 до 19, и од 19,30 до 22 годзин. През викенд жимски базен отворени од 12 до 15, и од 16 до 19 годзин. Тиж, през викенд женскей популациї на розполаганю и ткв. „женски термин” од 19 до 20 годзин.

Нє меняла ше анї цена уходнїци, та дньова уходнїца 200 динари, а мешачна препуснїца за 15 уходи на жимски базен кошта 2 000 динари.

Тей сезони зазначени и одлични резултати у роботи лєтнього базену – предане вецей як 40 000 карти, цо рекордни резултат у потерашнєй роботи Центра за физкултуру „Драґо Йовович” у Вербаше, пренєсол општински сайт.

ПОВЯЗАНИ ТЕКСТИ